ހަމާސް އިން އިސްރާއިލްގެ ވެރިރަށް ޓެލް އަވީވް އަށް މިއަދު ވަރުގަދަ ރޮކެޓް ހަމަލާތަކެއް ދީފިއެވެ.

ހަމާސް އިން ވަނީ މިހަމަލާ ދިން ކަން ކަށަވަރުކޮށްދީފައެވެ. އިޒްރޭލުގެ އެމްބިއުލާންސް ސާވިސް އިން ބުނީ މި ހަމަލާގައި ދެ މީހަކަށް އަނިޔާވެފައިވާކަމަށެވެ.

ހަމާސް އިން ބުނީ މިހަމަލާގެ މައިގަނޑު ބޭނުމަކީ ހަމާސްގެ ބާރު ޣައްޒާއިން ކަނޑުވާލުމަށް އިސްރާއިލުން ކުރާ މަސައްކަތަކީ ނުވާނެ ކަމެއްކަމުގައި ދެއްކުންކަމަށެވެ. އަދި ވީރާނާވެފައިވާ ބިމެއްކަމަށް އިސްރާއިލުން ޤައްޒާ ދެކުނަސް ހީނުކުރާ ފަދަ ހަމަލާތައް އަދިވެސް ކުރިއަށް އޮތްތަނުގައި ހަމާސް އިން އިސްރާއީލަށް ދޭނެ ކަމަށް ހަމާސްގެ ތަރުޖަމާނު އަބޫ އުބެއިދާ ވަނީ ވިދާޅުވެފައެވެ.

ހަމާސް ގެ ރޮކެޓް ހަމަލާ އަމާޒުވީ ސަރަހައްދު

ހަމާސްގެ ޖަމާއަތުން މިއަދު ދިން ހަމަލާގައި ބައިވެރިވެފައިވަނީ އެޖަމާއަތަށް ތާއީދުކުރާ އިސްލާމިކް ޖިހާދު ޖަމާއަތުންނެވެ. އިސްރާއިލް ކައިރީގައި އޮންނަ ސްޑެރޯޓާއި ނީރް އަމް ގެ އިތުރުން އިސްރާއީލުގެ އެހެން އަވަށްތަކަށް ވެސް ރޮކެޓް ހަމަލާތަކެއް ދީފައިވާ ކަމަށް އިސްލާމިކް ޖިހާދުން ވަނީ ބުނެފައެވެ. އިސްރާއީލުގެ އަސްކަރިއްޔާއިން ބުނީ ޣައްޒާއިން ފޮނުވާލި ފަސް ރޮކެޓް އިސްރާއިލުގެ އަސްކަރިއްޔާއިން ދިފާއުކޮށްފައިވާކަމަށެވެ.

ހަމާސްގެ ރޮކެޓް ހަމަލާ އަމާޒުވި ސަރަހައްދެއް

އިސްރާއީލުން ބުނަނީ ހަމާސް ޖަމާއަތުގެ މުޖާހިދުން ހަނގުރާމަ ކުރަނީ ސްކޫލްތަކާއި ހޮސްޕިޓަލްތައް ހިމެނޭ ގޮތަށް އާބާދީ ބޮޑު ސަރަހައްދުގައި ހަދާފައިވާ މީހުން ދިރިއުޅޭ ތަންތަނުގައި ތިބެގެން ކަމަށެވެ. ނަމަވެސް އަބޫ އުބައިދާ ވަނީ މިކަން ދޮގުކުރައްވައި ހަމާސްގެ މުޖާހިދުންނާއި ހަނގުރާމަ ކުރުމަށް ޣައްޒާގެ މީހުން ނޫޅޭ ސަރަހައްދުތަކަށް އައުމަށް އިސްރާއިލުގެ އިސްތިއުމާރީ ސިފައިންނަށް ގޮވާލައްވާފައެވެ. އަދި އިސްރާއިލަށް ފަސޭހަ ވާނީ ކުޑަކުދިންނާއި އަންހެނުން ބޮލަށް ވައިގެ މަގުން ބޮން އަޅަން ކަމަށާއި، ހަނގުރާމައިގެ މައިދާނުން ހަމާސްގެ މުޖާހިދުންނާއި ބައްދަލުކޮށް އެއް ހަމައެއްގައި ކުރިމަތިލުމުގެ ފެންވަރެއް އިސްރާއީލު އަސްކަރިއްޔާގެ ކިބައިގައި ނެތް ކަމަށް ވެސް އަބޫ އުބެއިދާ ވަނީ ވިދާޅުވެފައެވެ.

ހަމާސް އިން ހަމަލާ ދިން ސަރަހައްދުގައި އިސްރާއީލުގެ ސިފައިން ހަރަކާތްތެރިވަނީ

ޣައްޒާގެ އެންމެ ބޮޑު ރެފިއުޖީ ކޭމްޕްގެ ޖަބާލިއާ ވަށާލުމަށްފަހު އިސްރާއީލުގެ ޓޭންކުތައް މިދިޔަ ހޯމަ ދުވަހު ވަނީ ޖަބާލިއާއަށް ވަންނަން މިސްރާބު ޖަހާފައެވެ. ހަމާސް އިން މިއަދު ދިން ރޮކެޓް ހަމަލާއަށް ފަހު އިސްރާއީލުގެ އަސްކަރިއްޔާއިން ވަނީ ޖަބާލިއާއިން މީހުން ހުސްކުރުމުގެ އަމުރުތައް ނެރެ އުތުރުގެ ރަށްތައް ކަމަށްވާ ބެއިތް ހަނޫން އާއި ބެއިތް ލަހިޔާގެ ސަރަހައްދުތައް ހިޞާރުކޮށްފައެވެ.

އިސްރާއީލުން ޣައްޒާގައި ހިންގަމުން އަންނަ ނަސްލު ނައްތާލުމުގެ ޖަރީމާތަކުގެ ސަބަބުން ފަލަސްތީނުގެ ގާތްގަނޑަކަށް 42،000 މީހުން ޝަހީދުވެފައިވާ ކަމަށް އެ ގައުމުގެ ސިއްހަތާ ބެހޭ ވުޒާރާއިން ވަނީ ހާމަކޮށްފައެވެ.