އިސްރާއީލުން ލުބުނާނަށް ހަމަލާދިނުން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ކުށްވެރި ކުރައްވައިފިއެވެ.

ރައީސް އެފަދައިން ކުށްވެރިކުރެއްވީ "އެކްސް"ގައި ކުރެއްވި ޕޯސްޓެއްގައެވެ. އެގޮތުން އެ ޕޯސްޓުގައި ރައީސް ވިދާޅުވީ، އިސްރާއީލުން ލުބުނާނާ ދެކޮޅަށް ހިންގާ އަނިޔާވެރިކަމުގެ އަމަލުތަކުގެ ސަބަބުން ލުބުނާންގެ އާންމުން މަރުވެ، އެތައް ބައެއްގެ ގެދޮރު ގެއްލިފައިވާ ކަމަށެވެ.

Ad by Hajj Corporation

އަދި އެކަމުގެ ސަބަބުން އެތައް ހާސް ބަޔަކު ޒަހަމްވެފައިވާ ކަމަށާއި އެކަމަކީ ބައިނަލްއަގްވާމީ ގާނޫނުތަކާއި ބައިނަލްއަގުވާމީ އިންސާނީ ހައްގުތަކާ ބެހޭ ގާނޫނާ ވަރަށް ބޮޑަށް ހިލާފު ކަމެއްކަމަށް އެމަނިކުފާނު ވިދާޅުވިއެވެ.

ރައީސް ވިދާޅުވީ އިޒްރޭލު ޖަވާބުދާރީ ކުރުވުމަށާއި ލުބުނާނާއި ޣައްޒާގައި ވަގުތުން ހަނގުރާމަ ހުއްޓާލުމަށް ބައިނަލްއަގްވާމީ މުޖުތަމައުން ވަގުތުން ފިޔަވަޅު އަޅަން ޖެހޭކަމަށެވެ.

ރައީސް އެފަދައިން ވިދާޅުވިއިރު، އިސްރާއީލުން ލުބުނާނަށް ދެމުންދާ ޙަމަލާތަކުގައި މިހާތަނަށް 700 އެއްހާ މީހުން މަރުވެފައިވާ ކަމަށް ލުބުނާނުގެ ސިއްޚަތާ ބެހޭ ވުޒާރާއިން މައުލޫމާތުދެއެވެ.