ޔޫރަޕުގެ ޗެމްޕިއަން ސްޕެއިނާއި ކޮޕާ އެމެރިކާގެ ޗެމްޕިއަން އާޖެންޓީނާ ބައްދަލުކުރާ ފައިނަލިސިމާ މެޗު މާރޗް 27 ގައި ގަތަރުގެ ދޯހާގައި ބާއްވަން ފީފާއިން ކަށަވަރުކޮށްފިއެވެ. މި މެޗު ކުޅުމަށް ހަމަޖެހިފައިވަނީ ލުސައިލް ސްޓޭޑިއަމްގައެވެ. މި ބައްދަލުވުމަކީ ގިނަ ބަޔަކު މިހާތަނަށް އުފެދުނު އެންމެ މޮޅު ކުޅުންތެރިޔާގެ ގޮތުގައި ޤަބޫލުކުރާ ލިއޮނަލް މެސީ (ގޯޓު) އާއި ލަމީން ޔަމާލް (ބޭބީ ގޯޓު) ބައްދަލުކުރާނެވަރަށް ގިނަ ބަޔަކު އިންތިޒާރުކުރަމުން އަދި މެޗެކެވެ.

މި މެޗަކީ ފައިނަލެއްގެ ފުރިހަމަ މާހައުލެއްގައި ބޭއްވުމަށް ފީފާއިން ވަނީ ރާވާފައެވެ. އެގޮތުން ޓީމުތައް އެރައިވްވުން، ތަމްރީނުތައް އަދި ނޫސްވެރިންގެ ބައްދަލުވުންތައް ވެސް ބޮޑު ފެންވަރެއްގައި ބޭއްވުމަށް ވަނީ ހަމަޖެހިފައެވެ.

Ad by Hajj Corporation

ފުރަތަމަ މި މެޗު ކުޅުމަށް ހަމަޖެހިފައި އޮތީ މާރޗް 28 ގައެވެ. ނަމަވެސް ފީފާއިން ވަނީ އެ ތާރީޚް އެއް ދުވަސް ކުރިއަށް ޖައްސާ މާރޗް 27 ވާ ހުކުރު ދުވަހަށް ބަދަލުކޮށްފައެވެ. މި ފައިނަލިސިމާ މެޗު ބޭއްވުމަށް ހަމަޖެހިފައިވަނީ ސްޕެއިން ވޯލްޑް ކަޕަށް ސީދާ ގޮތެއްގައި ކޮލިފައިވުމުންނެވެ. މިކަން ވާނެ ކަމަށް ބެލެވެއެވެ.

ޔޫއެފާގެ މެޗު ކޯޓާގެ ޝަރުތުތައް ފުރިހަމަ ކުރުމަށްޓަކައި، ސްޕެއިންގެ ފެޑެރޭޝަނުން ދަނީ މާރޗްގެ އިންޓަރނޭޝަނަލް ވިންޑޯގައި ދެވަނަ ރަޙުމަތްތެރިކަމުގެ މެޗެއް ކުޅުމަށް ރާވަމުންނެވެ. މި މެޗު ވެސް ދޯހާގައި ނުވަތަ ކައިރީގެ ގައުމެއްގައި ކުޅުމަށް މަސައްކަތް ކުރަމުންދާ ކަމަށް މައުލޫމާތު ލިބެއެވެ. މި މެޗުގައި ސްޕެއިން ކުޅޭނީ އެމީހުންގެ ހުދު އެވޭ ކިޓުގައެވެ، އަދި އާޖެންޓީނާ ކަޅު ކިޓުގައި ކުޅޭނެ ކަމަށް ލަފާކުރެވެއެވެ.