ބާސެލޯނާގެ ރައީސް ޖޮއާން ލަޕޯޓާ ވަނީ، އެ ކްލަބުގެ ޒުވާން ތަރި ލަމީން ޔަމާލް ހޯދުމަށް ފްރާންސްގެ ޕީއެސްޖީން 250 މިލިއަން ޔޫރޯގެ ބޮޑު ހުށަހެޅުމެއް ހުށަހެޅިކަން އަނެއްކާވެސް ކަށަވަރުކޮށްދީފައެވެ. މި ހުށަހެޅުމަކީ ޔަމާލް ދުނިޔޭގެ ފެންވަރުގެ ތަރިއަކަށް ވުމުގެ ކުރިން ލިބުނު ހުށަހެޅުމެއްކަން އޭނާ ފާހަގަކުރެއްވިއެވެ.

ލަޕޯޓާ މިކަން ހާމަކުރެއްވީ އޭނާގެ ފޮތް ކަމަށްވާ (މިއީ އަހަރެމެން ބާސާ ސަލާމަތްކުރި ގޮތް) ނެރުމަށް ބޭއްވި ރަސްމިއްޔާތުގައެވެ. ލަޕޯޓާ ބުނެފަެިވަނީ ، "ޕީއެސްޖީން ލަމީން ޔަމާލްއަށް 250 މިލިއަން ޔޫރޯ ހުށަހެޅުމުން އަހަރެމެން އެކަން ދޫކޮށްލިއިރު އޭނާގެ އުމުރަކީ އެންމެ 17 އަހަރު. އެ ވަގުތު ބައެއް މީހުންނަށް ހީވީ އަހަރެމެންނަކީ މޮޔައިން ކަމަށް،" ކަމަށެވެ.

Ad by Hajj Corporation

ފަބްރީޒިއޯ ރޮމާނޯ ރިޕޯޓްކޮށްފައިވާ ގޮތުގައި، ޕީއެސްޖީން މި ހުށަހެޅުން ހުށަހެޅީ 2024 ވަނަ އަހަރުގެ ޔޫރޯ މުބާރާތުގެ ކުރިންނެވެ. އެ މުބާރާތުގައި ސްޕެއިން ތަމްސީލުކޮށް ޔަމާލް ވަނީ މުޅި މުބާރާތުގައި ފާހަގަކޮށްލެވޭ އެންމެ މޮޅު އެއް ކުޅުންތެރިޔާގެ ގޮތުގައި ފެނިގެން ގޮސްފައެވެ.

ޔޫރޯ މުބާރާތަށްފަހު ޔަމާލްގެ އަގާއި މަގުބޫލުކަން ވަނީ ވަރަށް ބޮޑަށް އުފުލިފައެވެ. މިހާރު އޭނާ އަކީ ބާސެލޯނާގެ މަޝްހޫރު ނަންބަރު 10 ޖާޒީގައި ކުޅެމުން އަންނަ މުހިންމު ކުޅުންތެރިއެކެވެ. ޔަމާލްގެ ކުޅުން ކުރިއަރަމުންދާ ގޮތަށް ބަލާއިރު، އޭނާ ވިއްކާލުމުގެ އެއްވެސް ވިސްނުމެއް ބާސެލޯނާއިން ނުގެންގުޅޭކަން މިހާރު ވަނީ ސާފުވެފައެވެ.

ބާސެލޯނާގެ މާލީ ހާލަތު ދަތި ދަނޑިވަޅެއްގައިވެސް، އެހާ ބޮޑު އަދަދެއްގެ ހުށަހެޅުމަކަށް ނޫނެކޭ ބުނުމުން ދޭހަވަނީ ކްލަބުގެ މުސްތަގުބަލަށް ޔަމާލްގެ މުހިންމުކަން އޮތް މިންވަރެވެ. ޔަމާލް މިހާރު ބެލެވެނީ ދުނިޔޭގެ ފުޓްބޯޅައިގައި ހުރި އެންމެ އުންމީދީ ޒުވާން ކުޅުންތެރިޔާގެ ގޮތުގައެވެ.