ޗެމްޕިއަންސް ލީގުގެ ކުއާޓާ ފައިނަލްގެ ދެވަނަ ލެގުގައި ބާސެލޯނާގެ މައްޗަށް ކުރި ހޯދައި، އެގްރިގޭޓް 3-2 ގެ ނަތީޖާއަކުން އެތުލެޓިކޯ މެޑްރިޑް މުބާރާތުގެ ސެމީ ފައިނަލަށް ދަތުރުކޮށްފިއެވެ. އަންގާރަ ދުވަހުގެ ރޭ ކުޅުނު މި މެޗު ބާސެލޯނާ އިން 2-1 އިން ކާމިޔާބު ކުރި ނަމަވެސް، ފުރަތަމަ ލެގުގައި އެތުލެޓިކޯ އިން ހޯދާފައިވާ 2-0 ގެ ކުރިއެރުމާއެކު އެޓީމަށް ވަނީ ކުރި ލިބިފައެވެ.

މެޗުގެ ވަރަށް ކުރީކޮޅު ބާސެލޯނާ އިން ވަނީ ލަނޑެއް ޖަހައި އުންމީދު އާކޮށްފައެވެ. ފެރާން ޓޮރޭޒް ތަނަވަސްކޮށްދިން ފުރުސަތަކުން ލަމީން ޔަމާލް ވަނީ މެޗުގެ 4 ވަނަ މިނެޓުގައި ލަނޑު ޖަހައި ބާސެލޯނާ އަށް ލީޑު ނަގައިދީފައެވެ. މިއީ 2018 ވަނަ އަހަރު ލިއޮނަލް މެސީ ޗެލްސީ ކޮޅަށް ޖެހި ލަނޑަށް ފަހު، ޗެމްޕިއަންސް ލީގުގެ ނޮކްއައުޓް ބުރުގައި ބާސެލޯނާ އިން ޖެހި އެންމެ އަވަސް ލަނޑެވެ. މީގެ އިތުރުން ޔަމާލް ވެފައިވަނީ މި މުބާރާތުގެ ތާރީޚުގައި 20 ގޯލް ކޮންޓްރިބިއުޝަން ހަމަކުރި އެންމެ ޒުވާން ކުޅުންތެރިޔާއަށެވެ.

Ad by Hajj Corporation

ބާސެލޯނާ އިން މެޗުގެ 24 ވަނަ މިނެޓުގައި ދެވަނަ ލަނޑެއް ޖަހައި އެގްރިގޭޓް ނަތީޖާ ހަމަހަމަ ކުރިއެވެ. މި ލަނޑު އެޓީމަށް ކާމިޔާބުކޮށްދިނީ ފެރާން ޓޮރޭޒްއެވެ. ނަމަވެސް، މެޗުގެ 31 ވަނަ މިނެޓުގައި އެތުލެޓިކޯގެ މާކޯސް ލޮރެންޓޭ ތަނަވަސްކޮށްދިން ފުރުސަތަކުން އަޑެމޯލާ ލުކްމަން ވަނީ އެޓީމަށް މުހިންމު ލަނޑެއް ކާމިޔާބުކޮށްދީ އަލުން އެގްރިގޭޓް ލީޑު ހޯދައިދީފައެވެ.

މެޗުގެ ފަހުކޮޅު ބާސެލޯނާ އަށް މައްސަލަތައް ކުރިމަތިވީ 79 ވަނަ މިނެޓުގައި އެރިކް ގާސިއާ އަށް ދެއްކި ރަތް ކާޑާއެކުގައެވެ. ބަދަލު ކުޅުންތެރިޔާ އެލެކްސެންޑަރ ސޯލޮތް އަށް ކުރި ފައުލަކާ ގުޅިގެން ވީއޭއާރު ބެލުމަށްފަހު ގާސިއާ އަށް ރަތް ކާޑު ދެއްކުމުން ބާސެލޯނާ އިން މެޗު ނިންމާލަން ޖެހުނީ 10 ކުޅުންތެރިންނާއެކުގައެވެ. މިއީ ޗެމްޕިއަންސް ލީގުގެ ނޮކްއައުޓް ބުރެއްގެ ދެ ލެގުގައި ވެސް ބާސެލޯނާގެ ކުޅުންތެރިއަކަށް ރަތް ކާޑު ދެއްކި ފުރަތަމަ ފަހަރެވެ.

މެޗުގެ ފަހު ވަގުތުކޮޅު ނަތީޖާ ހަމަހަމަކޮށް މެޗު އިތުރު ވަގުތަށް ގެންދަން ރޮނާލްޑް އަރައުހޯ އަށް ރަނގަޅު ފުރުސަތެއް ލިބުނު ނަމަވެސް، އޭނާ ބޮލުން ފޮނުވާލި ބޯޅަ ދިޔައީ ގޯލުގެ މަތިން ބޭރަށެވެ. ބާސެލޯނާގެ ކޯޗު ހަންސީ ފްލިކް ވަނީ ގާސިއާ އަށް ދެއްކި ރަތް ކާޑަކީ މެޗުގެ ނަތީޖާ ބަދަލުވެގެންދިޔަ މައިގަނޑު ސަބަބު ކަމަށް ބުނެ ނުރުހުން ފާޅުކޮށްފައެވެ.
މި ބައްޔާއެކު ބާސެލޯނާ ޖެހިޖެހިގެން 11 އަހަރު ޗެންޕިއަންސް ލީގު ތަށްޓެއް ނުލިބި މުބާރާތުން ކަޓާފައިޥާއިރު، އެންމެ ޒުވާންކަމުގެ ގިނަ އެވޯޑްތަކެއް ހޯދާފައިވާ ޔަމާލް ވަނީ ޖެހިޖެހިގެން ތިންއަހަރު ޗެންޕިއަންސް ލީގުން ކެޓި އެންމެ ޒުވާން ކުޅުންތެރިޔާގެ އެވޯޑްވެސް ހޯދާފައެވެ.