ބާސެލޯނާގައި އަންގާރަ ދުވަހު ސްޕެއިން އާއި މިޞްރު ބައްދަލުކުރި އެކުވެރިކަމުގެ މެޗުގައި އިވުނު ނަސްލީ ތަފާތުކުރުމުގެ އަޑުތަކަކީ "އިހުތިރާމް ކުޑަ އަދި ބަލައިގަނެވޭނެ ކަންތައްތަކެއް ނޫން" ކަމަށް ބުނެ ސްޕެއިންގެ ވިންގަރ ލަމީން ޔަމާލް އެކަން ކުށްވެރިކޮށްފިއެވެ. ބާސެލޯނާގެ އާރް.ސީ.ޑީ.އީ ސްޓޭޑިއަމްގައި ކުޅުނު މި މެޗުގެ ފުރަތަމަ ހާފުގައި އިވުނު އިސްލާމްދީނަށާއި ބޭރު މީހުންނަށް ނިސްބަތްކޮށް ގޮވި އަޑުތައް ސްޕެއިންގެ ފުލުހުން މިހާރު ދަނީ ތަހުގީގު ކުރަމުންނެވެ.

މެޗުގެ ހާފް ޓައިމްގައި ސްޓޭޑިއަމްގެ ސްކްރީނުން ވަނީ ނަސްލީ ތަފާތުކުރުމުގެ ވާހަކަތަކާއި ލަވަތައް ނުކިޔުމަށް ސަޕޯޓަރުންނަށް އިންޒާރު ދީފައެވެ. އަދި ދެވަނަ ހާފު ފެށުނުތަނާ މި މެސެޖު ތަކުރާރުކުރުމުން، ސްޓޭޑިއަމްގެ ބައެއް ސަރަހައްދުތަކުން ސަޕޯޓަރުން ވަނީ އަޑުގަދަކޮށް ނުރުހުން ފާޅުކޮށްފައެވެ.

Ad by Hajj Corporation

އުމުރުން 18 އަހަރުގެ ޔަމާލް އިންސްޓަގްރާމްގައި މެސެޖު ފަށަމުން ބުނެފައިވަނީ 'އަލް ހަމްދުލިއްލާހި! އަހަންނަކީ މުސްލިމެއް'، މީގެ އިތުރުން ލިޔެފައިވަނީ "އެ އަޑުތައް އަމާޒުކުރެވުނީ އިދިކޮޅު ޓީމަށްކަން އަދި އަހަންނަށް އަމާޒުކޮށްގެން ނޫންކަން އެނގޭ، އެކަމަކު މުސްލިމެއްގެ ހައިސިއްޔަތުން އެއީ އަދިވެސް އިހުތިރާމް ކުޑަ އަދި ކެތްނުކުރެވޭނެ ކަމެއް،" ކަމަށެވެ. އަދި ދީނެއް ބޭނުންކޮށްގެން ދަނޑުމަތީގައި މަލާމާތްކުރުމަކީ ޖާހިލުކަމާއި ނަސްލީ ތަފާތުކުރުން ކަމަށްވެސް އޭނާ ފާހަގަކުރިއެވެ.

ސްޕެއިންގެ ފުޓްބޯޅަ ފެޑެރޭޝަން (RFEF) އިން ވެސް ވަނީ މި އަމަލުތައް ހަރުކަށި އިބާރާތުން ކުށްވެރިކޮށްފައެވެ. އެ ފެޑެރޭޝަނުން ނެރުނު ބަޔާނެއްގައި ބުނެފައިވަނީ ފުޓްބޯޅައިގައި ނަސްލީ ތަފާތުކުރުމާ ދެކޮޅަށް އެ ފަރާތުން ތެދުވާނެ ކަމަށާއި، ސްޓޭޑިއަމްތަކުގެ ތެރޭގައި ހިންގާ އެއްވެސް އަނިޔާވެރި އަމަލެއް ބަލައިނުގަންނާނެ ކަމަށެވެ.

ސްޕެއިންގެ ކޯޗު ލުއިސް ޑި ލަ ފުއެންޓޭ ވިދާޅުވީ މިފަދަ ކަންކަން ކުރާ މީހުން މުޖުތަމައުން އެކަހެރިކޮށް، ދަނޑުތަކާ ވީހާވެސް ދުރަށް ފޮނުވާލަން ޖެހޭނެ ކަމަށެވެ. މި މެޗަކީ ފުރަތަމަ ގަތަރުގައި ކުޅެން އޮތް މެޗެއް ނަމަވެސް، މެދުއިރުމަތީގެ ހަނގުރާމައިގެ ސަބަބުން މި މެޗު ވަނީ ބާސެލޯނާއަށް ބަދަލުކޮށްފައެވެ.

މި މެޗު 0-0 އިން އެއްވަރުވުމާ ގުޅިގެން، 2030 ވަނަ އަހަރުގެ ވޯލްޑް ކަޕް ބާއްވާ އެއް ގައުމު ކަމަށްވާ ސްޕެއިން ވަނީ ދުނިޔޭގެ ރޭންކިންގެ އެއްވަނަ މަގާމުން ދަށަށް ގޮސްފައެވެ. މި މެޗުގައި މިޞްރު ޓީމުން ފެނިފައިނުވަނީ އަނިޔާގެ ސަބަބުން ކުޅުމާ ދުރުގައި ހުރި މުހައްމަދު ސަލާހެވެ.