ވޯލްޑްކަޕް ބޯމަތި ވެފައިވާ ދަނޑިވަޅެއްގައި ބާސެލޯނާގެ ޒުވާން ތަރި ލަމީން ޔަމާލް، އެ ކްލަބުގެ 2025/26 ސީޒަން ނިންމުމުގެ ގޮތުން ބޭއްވި ރޭގަނޑުގެ ކެއުމަށް އޭނާގެ އާ ލޯބިވެރިޔާ އިނޭސް ގާސިއާއާއެކު ހާޒިރުވެއްޖެއެވެ. މި ހަފްލާއަކީ ސީޒަނުގައި ކްލަބުން ހޯދި ކާމިޔާބީތައް ފާހަގަކުރުމަށް ބޭއްވި ހާއްސަ ހަފްލާއެކެވެ.

މި ހަފްލާއަށް މި ދެމީހުން ހާޒިރުވިއިރު، ދެމީހުންވެސް ތިބީ ކަޅު ކުލައިގެ ހެދުމުގައެވެ. މިއީ ޔަމާލް އާއި އިނޭސް އެކުގައި މިފަދަ ރަސްމީ ހަފްލާއަކުން ފެނުނު ފުރަތަމަ ފަހަރެވެ. މީގެ ކުރިންވެސް މި ދެމީހުން އެކުގައި ގްރީސްއަށް ކުރި ދަތުރެއްގެ ތެރެއިން އާންމުންނަށް ފެނިފައިވެއެވެ.

Ad by Hajj Corporation

މި ގުޅުމާ ގުޅޭގޮތުން ޔަމާލް ނުވަތަ އިނޭސްވެސް ސޯޝަލް މީޑިއާގައި ރަސްމީކޮށް އެއްވެސް އެއްޗެއް ހާމަކޮށްފައެއް ނުވެއެވެ. ނަމަވެސް، ބާސެލޯނާގެ ކުޅުންތެރިންނަށް ހާއްސަ ކުރެވުނު މި ރޭގަނޑުގެ ކެއުމަށް އެކުގައި ދިއުމަކީ، މޮޑެލްއެއްގެ ގޮތުގައި މަސައްކަތްކުރާ އިނޭސްއާއެކު ޔަމާލް ސީރިއަސް ގުޅުމެއް ބާއްވަމުންދާކަމުގެ ހެއްކެއް ކަމަށް މީޑިއާތަކުން ދަނީ ބުނަމުންނެވެ.

މި ހަފްލާ ނިންމާފައި ނުކުތްއިރު، ޔަމާލް އާއި އިނޭސްގެ އިތުރުން ބާސެލޯނާގެ ފާމިން ލޮޕޭޒް އާއި އޭނާގެ ބައިވެރިޔާ ބާޓާ ގަލާޑޯވެސް އެކުގައި ކެމެރާތަކަށް އަރާފައިވެއެވެ. މި މަންޒަރުތައް އާންމުވުމާއެކު، ޔަމާލްގެ އާ ލޯބިވެރިޔާއާ ބެހޭގޮތުން ސޯޝަލް މީޑިއާގައި ބޮޑު ސަމާލުކަމެއް ވަނީ ލިބިފައެވެ.