ފުވައްމުލައް ސިޓީގެ ގިނަ އަދަދެއްގެ ގޭބިސީތަކުގައި ކްރޮސް ކަނެކްޝަން (ދެ ފެން އެއްވާގޮތަށް) ހަދާފައިވާކަން ފާހަގަކުރެވިފައިވާ ކަމަށާއި، އެއީ މަނާ ކަމެއް ކަމަށް ޔުޓިލިޓީ ރެގިއުލޭޓަރީ އޮތޯރިޓީން ސިޓީ ކައުންސިލަށް އަންގައިިފިއެވެ.

ފުވައްމުލައް ސިޓީގެ ގޭބީސީތަކަށް ދޫކުރަމުން އަންނަ ސަޕްލައި ފެން ތަޣައްޔަރުވެ ވަގުތީ ގޮތުން ފެން ކަނޑާލީ މީގެ ހަފްތާއެއްހާ ވަރަކަށް ދުވަސް ފަހުންނެވެ.

Ad by Hajj Corporation

ފެނަކަ ފުވައްމުލައް ބްރާންޗުން ނެރުނު ބަޔާނުގައިވެސް ވަނީ އެ ސިޓީގެ ގިނަ އަދަދެއްގެ ގޭބިސީތަކުގައި ކްރޮސް ކަނެކްޝަން (ދެ ފެން އެއްވާގޮތަށް) ހަދާފައިވާކަން ފާހަގަކުރެވިފައިވާކަމަށް ބުނެފައެވެ.

ފެނުގެ ވަސީލަތްތައް ޙިމާޔަތްކޮށް ބެލެހެއްޓުމާބެހޭ ޤަވާއިދުގައި ބަޔާންކޮށްފައިވާ ގޮތުން، އެންމެހައި އިމާރާތްތައް އިމާރާތް ކޮށްފައި ހުންނަންވާނީ އެ އިމާރާތްތަކުގެ ފުރާޅުތަކުން ނުވަތަ ޓެރެސްއިން އަންނަ ފެނާއި، ވާރޭފެން ތާނގީތަކުގެ އޯވަރފްލޯ ފެން، ވަޅަށް ނުވަތަ ފެން ހިންދުމަށް ޚާއްސަކޮށްފައިވާ ނިޒާމެއް މެދުވެރިކޮށް، ބިމަށް ހިންދޭ ގޮތަށެވެ. އަދި މިޤަވާއިދުގެ 8 ގެ (ނ)ގައި ބަޔާންކޮށްފައިވާ ގޮތުން، އެއްވެސް އިމާރާތެއްގެ ފުރާޅުން ނުވަތަ ޓެރަސްއިން އަންނަ ފެނާއި، ފެން ނަގައި ރައްކާކުރާ ފެންތާންގީތަކުގެ އޯވަރފްލޯ ފެން ނަރުދަމާ ނިޒާމަށް ގުޅުމަކީ، ނުވަތަ ނަރުދަމާ ނިޒާމު މެދުވެރިކޮށް ބޭރުކުރުމަކީ، ނުވަތަ ހިންދުމަކީ މަނާކަމެކެވެ.

ގަވާއިދާއި ޚިލާފަށް ނަރުދަމާ ނިޒާމަށް އެއްވެސް ހޮޅިއެއް ގުޅާފައިވާނަމަ 15 ދުވަސް ތެރޭގައި އެކަން ރަނގަޅު ކުރުމަށް ފެނަކައިން އޭރު އެންގިއެވެ. އަދި މި މުއްދަތުގައި އެމައްސަލަ ހައްލުނުކުރާ ތަންތަނުން ޚިދުމަތް ކަނޑާލެވޭނެކަމަށް ވެސް ވަނީ އަންގާފައެވެ.

މިކަމާ ގުޅިގެން ފުވައްމުލައް ސިޓީ ކައުންސިލުންވެސް ވަނީ އެ ސިޓީގެ އެއްވެސް ގޭބިސީއެއްގައި ފެނުގެ ކްރޮސް ކަނެކްޝަން ހަދާފައިވާނަމަ، ވީ އެންމެ އަވަސް ފުރުސަތެއްގައި ފެނަކަ ކޯޕަރޭޝަން ލިމިޓެޑްގެ އުސޫލުތަކާ އެއްގޮތްވާ ގޮތުގެމަތިން އެކަން އިސްލާޙުކުރުމަށް އަންގާފައެވެ.