މާލެއާއި ހުޅުމާލެއާ ދެމެދު ގާއިމުކުރަމުންދާ ފެނުގެ ކަނެކްޓިވިޓީ ވިއުގަ މިއަހަރުގެ ނިޔަލަށް ނިންމާ، އެއްކޮށް ބޭނުންކުރަން ފެށޭނެކަމަށް އެމްޑަބްލިއުއެސްސީގެ މެނޭޖިންގ ޑިރެކްޓަރ ޢަބްދުލް މަތީން މުޙައްމަދު ވިދާޅުވެއްޖެއެވެ.

އެމްޑީ މަތީން ވިދާޅުވީ، މި ދެ އަހަރުގެ ތެރޭގައި އެކުންފުނިން އެންމެ ބޮޑު އިސްކަމެއްދިނީ ރައްޔިތުންނަށް ފޯރުކޮށްދޭ ޚިދުމަތްތަކުގެ ފެންވަރު ރަނގަޅުކޮށް، ޚިދުމަތުގެ ޔަޤީންކަން އިތުރަށް ކަށަވަރުކުރުމަށް ކަމަށެވެ.އަދި މި ސަރުކާރު ވެރިކަމާ ހަވާލުވިއިރު އިގްތިޞާދީގޮތުން ގައުމުގެ ހާލަތު އޮތްގޮތުން ޚަރަދުތައް ކުޑަކުރުމަށް މުހިންމު ފިޔަވަޅުތަކެއް އެޅިކަމަށް ވެސް އެމްޑީ ފާހަގަ ކުރެއްވިއެވެ.

Ad by Hajj Corporation

އެގޮތުން ރައީސްގެ އިރުޝާދަކީ ޚަރަދުތައް ކުޑަކުރުމާއި، ކޮންމެހެން ކުރަން ނުޖެހޭ ކަންތައްތައް ވަގުތީ ގޮތުން މަޑުކޮށްލުމަށްފަހު، ޚިދުމަތް ރަނގަޅުކުރުމަށް އިސްކަންދިނުން ކަމަށް މަތީން ފާހަގަކުރެއްވިއެވެ.

މިހާރު މި މަސައްކަތް ނިމުމަކާ ގާތްވެފައިވާއިރު، ވިއުގަ ޓެސްޓުކުރުމުގެ މަސައްކަތް ކުރަމުންދާކަމަށާއި، އަދި މިހާރު ވަގުތީގޮތުން ހޮޅީގެ މަސައްކަތް ނިންމާފައި ޚިދުމަތް ފޯރުކޮށްދޭންވެސް ފެށިފައިވާކަމަށް އޭނާ ހާމަކުރެއްވިއެވެ.

މަތީން އިތުރަށް ވިދާޅުވީ، ބާކީހުރި އިލެކްޓްރިކަލް އަދި މެކޭނިކަލް މަސައްކަތްތައް ނިމުމާއެކު މިއަހަރުގެ ނިޔަލަށް އެ ހޮޅި އެއްކޮށް ބޭނުންކުރެވޭނެކަމަށް އަމާޒުކުރާ ކަމަށެވެ.

އެގޮތަށް ވިއުގަ އެއްކޮށް ބޭނުންކުރަން ފެށުމުން ދުވާލެއްގެ މައްޗަށް 20،000 ޓަނުގެ ފެން މާލެއާއި ހުޅުމާލެއާ ދެމެދު އުފުލޭނެ ކަމަށް އެމްޑަބްލިއުއެސްސީން ލަފާކުރެއެވެ.