މާލެ ވޯޓަރ އެންޑް ސްވެރޭޖް ކޮމްޕެނީ (އެމްޑަބްލިއުއެސްސީ) ގެ ޗެއަރމަންކަމުގެ މަޤާމުންނާއި، އެ ކުންފުނީގެ ޑިރެކްޓަރުންގެ ބޯޑުގެ މެމްބަރުކަމުން ސ. ފޭދޫ، ނާޒުކީގޭ އަލްފާޟިލާ ޝަމްހޫޒާ އަޙުމަދު މިއަދު ވަކިކޮށްފިއެވެ.

ޝަމްހޫޒާ އަޙުމަދު އެމްޑަބްލިއުއެސްސީގެ ޗެއާމަންގެ މަގާމަށް އައްޔަނު ކުރެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގައި، 26 ޑިސެމްބަރު 2023 ގައެވެ.

Ad by Hajj Corporation

މަގާމުން ވަކިކުރެވުނު ޝަމްހޫޒާ އަކީ މީގެ ކުރިން މާލޭ ސިޓީ ކައުންސިލްގެ ޑިރެކްޓަރެއްގެ މަގާމު ފުރުއްވާފައިވާ ބޭފުޅެކެވެ. މީގެ އިތުރުން، އޭނާ ވަނީ މިނިސްޓްރީ އޮފް ހައުސިންގްގެ އިސް މަގާމުތަކެއްވެސް މީގެ ކުރިން އަދާކުރައްވާފައެވެ.

އެމްޑަބްލިއުއެސްސީގެ ބޯޑަށް މި ބަދަލު އައިސްފައިވާއިރު، އެ ކުންފުނީގެ މެނޭޖިން ޑިރެކްޓަރުގެ މަގާމުގައި ކުރިން ހުންނެވި އަބްދުލް މަތީން ވަނީ މިދިޔަ އޭޕްރީލް މަހުގެ 12 ވަނަ ދުވަހު އެ މަގާމުން އިސްތިއުފާ ދެއްވާފައެވެ.

ޝަމްހޫޒާ މަގާމުން ވަކިކުރި ސަބަބެއް ސަރުކާރުން ހާމަކުރައްވާފައެއް ނުވެއެވެ. ނަމަވެސް މިއީ ސަރުކާރުގެ ކުންފުނިތަކުގެ ހިންގުން ހަރުދަނާކުރުމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ގެންނަވަމުންދާ ބަދަލުތަކުގެ ތެރެއިން އައި ބަދަލެއް ކަމަށް ބެލެވެއެވެ.