ކީރިތި ޤުރްއާނާ ބެހޭ ޤައުމީ މަރުކަޒުގެ އައުޓްރީޗް ސެންޓަރެއް ތ. ވޭމަންޑޫގައި ހުކުރު ދުވަހު ރަސްމީކޮށް ހުޅުވައިފިއެވެ.

މި ސެންޓަރު ހުޅުވައިދެއްވީ، މަރުކަޒު ބެލެހެއްޓުމާ ހަވާލުވެހުރި ސްޓޭޓް މިނިސްޓަރ އަލްއުސްތާޛު ޢަބްދުﷲ ސަޢުދާންއެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވައުދެއްގެ ދަށުން ޢަމަލީކުރެވުނު މުހިންމު މަސައްކަތެކެވެ.

Ad by Hajj Corporation

ރައީސް މުޢިއްޒު ވަނީ ނޮވެންބަރު މަހުގެ ތެރޭގައި ތ. ވޭމަންޑޫއަށް ކުރެއްވި ދަތުރުފުޅެއްގައި، އެރަށުގައި ޤުރްއާނާ ބެހޭ ޤައުމީ މަރުކަޒުގެ އައުޓްރީޗް ސެންޓަރެއް ހުޅުވައިދެއްވާނެކަމަށް ވައުދުވެވަޑައިގެންފައެވެ. މި ސެންޓަރުތަކުގެ މަޤްސަދަކީ ރާއްޖޭގެ އެކި ކަންކޮޅުތަކުގައި ކީރިތި ޤުރްއާން ކިޔެވުމުގެ ފުރުސަތުތައް ފުޅާކޮށް، ދީނީ ތަޢުލީމަށް ހިތްވަރުދިނުމެވެ.

ވޭމަންޑޫ އައުޓްރީޗް ސެންޓަރު ހުޅުވުމަށް މިއަދު ބޭއްވި ރަސްމިއްޔާތުގައި، ކީރިތި ޤުރްއާނާ ބެހޭ ޤައުމީ މަރުކަޒު ބެލެހެއްޓުމާ ހަވާލުވެހުރި، ސްޓޭޓް މިނިސްޓަރ އަލްއުސްތާޛު ޢަބްދުﷲ ސަޢުދާންގެ އިތުރުން، ތ. އަތޮޅު ކައުންސިލްގެ ރައީސް އަބްދުالله ޝަރީފް ވެސް ބައިވެރިވެވަޑައިގެންނެވިއެވެ.

ތ. ވޭމަންޑޫ އައުޓްރީޗް ސެންޓަރުގައި ކިޔެވުމަށް ޚާއްސަކުރެވިފައިވާ ދެ ކްލާސް ރޫމާއި، މުވައްޒަފުންނަށް ބޭނުންވާ އޮފީސް ބައެއް ހިމެނެއެވެ. މި ސެންޓަރުގެ ސަބަބުން ވޭމަންޑޫގެ އިތުރުން އެއަތޮޅުގެ އެހެން ރަށްރަށުގެ ރައްޔިތުންނަށް ވެސް ކީރިތި ޤުރްއާން ކިޔެވުމުގެ ފުރުސަތުތައް ފަހިވެ، ޤުރްއާނުގެ ޢިލްމު އުނގެނުމަށް ބޮޑެތި ލުއިފަސޭހަތަކެއް ލިބިގެންދާނެއެވެ.

މިފަދަ މަރުކަޒުތައް ހުޅުވުމަކީ ދީނީ ތަޢުލީމު ރަށްރަށަށް ފޯރުކޮށްދިނުމަށް ސަރުކާރުން ދެއްވާ އަހަންމިއްޔަތުކަން ރަމްޒުކޮށްދޭ ކަމެކެވެ.