ނެޝަނަލް ޑްރަގް އެޖެންސީ (އެންޑީއޭ) އިން ފަރުވާ ހޯދާ މީހުންނަށް މަސްތުވާތަކެތި ދީގެން ނަހަމަ ގުޅުން ބާއްވާ ކަމަށް ތުހުމަތުކުރެވޭ މައްސަލައަކާ ގުޅިގެން ހައްޔަރުކުރި މުވައްޒަފުގެ ބަންދަށް 15 ދުވަސް ޖަހައިފިއެވެ.

މިގޮތަށް ކްރިމިނަލް ކޯޓުން އަމުރުކޮށްފައިވަނީ އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުންނެވެ.

Ad by Hajj Corporation

މި މައްސަލާގައި ހައްޔަރުކޮށްފައިވަނީ އެންޑީއޭގެ ޕިއަރ މެންޓަރގެ ވަޒީފާ އަދާކުރަމުން ދިޔަ ސ. ފޭދޫ، ފްލޮރިޑާ، 51 އަހަރުގެ މުޙައްމަދު ފަޞީޙްއެވެ.

އޭނާ ހައްޔަރުކޮށްފައިވަނީ ކޯޓު އަމުރެއްގެ ދަށުން ކަމަށް ދިވެހި ފުލުހުންގެ ޚިދުމަތުން ވަނީ ވިދާޅުވެފައެވެ. ތުހުމަތުކުރެވޭ މައްސަލައަކީ ފަރުވާ ހޯދާ މީހުންގެ ނާޒުކު ހާލަތުގެ ނާޖާއިޒު ފައިދާ ނަގައި، މަސްތުވާތަކެތި ދިނުމަށްފަހު ނަހަމަ ގުޅުން ބޭއްވުމުގެ ސީރިއަސް ތުހުމަތެކެވެ.

ދިވެހި ފުލުހުންގެ ޚިދުމަތުން ހާމަކުރެއްވި ގޮތުގައި، މި މައްސަލަ އެންޑީއޭއިން ފުލުހުންނަށް ހުށަހަޅާފައިވަނީ މިމަހުގެ 4 ވަނަ ދުވަހުއެވެ.

މުޙައްމަދު ފަޞީޙްގެ ބަންދަށް 15 ދުވަސް ޖަހާފައިވާއިރު، މި މައްސަލަ މިހާރު ދަނީ ފުލުހުންގެ ފަރާތުން ތަޙްޤީޤުކުރަމުންނެވެ.