ޔަހޫދީ ސިފައިން، ވެސްޓު ބޭންކުގައި ފަލަސްޠީނުގެ ދެ ޒުވާނުން ޝަހީދުކޮށްލައިފި
22 ނޮވެމްބަރު 2025 - 05:27
ޔަހޫދީން ހިފާފައިވާ ވެސްޓް ބޭންކުގެ ރަމަލާ ކައިރީގައި އޮންނަ ސަހަރަކަށް ޔަހޫދީ ސިފައިން ވަދެގަނެ، ފަލަސްޠީނުގެ ދެ ޒުވާނުން ޝަހީދުކޮށްލައިފިއެވެ.
16 އަހަރާއި 18 އަހަރުގެ މި ދެ ޒުވާނުން ޝަހީދުވެފައިވަނީ ގަޔަށް ބަޑިޖެހުމުގެ ސަބަބުން ލިބުނު އަނިޔާތަކަށް ފަރުވާދެމުން ދަނިކޮށެވެ.
Ad by Hajj Corporation
ފޮޓޯ: ރޮއިޓަރސް
ފަލަސްޠީނުގެ "ވަފާ" ނިއުސް އެޖެންސީން ރިޕޯޓުކޮށްފައިވާ ގޮތުގައި ޔަހޫދީ ސިފައިން ވަނީ ރޭގެ ވަގުތެއްގައި އެ ސަހަރަށް ވަދެގަނެ، މަގުތައް މައްޗަށާއި އިމާރާތްތަކުގެ މައްޗަށް ސިފައިން ފޮނުވާ، މުޅި ސަހަރަށް ބަޑިޖަހާފައެވެ.
މިކަމާ ގުޅިގެން ޔަހޫދީން ބުނެފައިވަނީ އެމީހުން ރޭ ހިންގި އޮޕަރޭޝަނެއްގައި ނުރައްކަލަކަށް ވެދާނެ ކަމަށް ބެލެވުނު ހަތަރު މީހެއް ގަޔަށް ބަޑިޖަހާފައިވާނެ ކަމަށާއި އެ ހަތަރު މީހުންވެސް ވަނީ މެޑިކަލް ޓީމުތަކުން އެސަރަހައްދުން ގެންގޮސްފައި ކަމަށެވެ. އަދި މި އޮޕަރޭޝަނަކީ "ސަލާމަތީ ބާރުތަކަށް ގެއްލުންދީ ހަމަނުޖެހުން އުފައްދަން އުޅުނު ބަޔަކަށް އަމާޒުކޮށްގެން ހިންގުނު އޮޕަރޭޝަނެއް" ކަމަށާއި މި އޮޕަރޭޝަނުގެ ތެރެއިން ގަލާއި ބަޑިބޭސް ބޭނުންކޮށްގެން ޔަހޫދީ ސިފައިންނަށް ހަމަލާދީފައިވާ ކަމަށްވެސް ޔަހޫދީން ބުނެއެވެ.
މިދިޔަ މަހުގެ 10 ވަނަ ދުވަހު އެކުލަވާލެވުނު ހަމަލާބަދަލުކުރުން ހުއްޓާލުމުގެ އެއްބަސްވުމާއެކު ހަމާސްއާއި ޔަހޫދީންނާ ދެމެދު ކުރެވެމުންދިޔަ ހަނގުރާމަ މަޑުޖެހިފައިވީނަމަވެސް އެއަށްފަހު ވެސްޓްބޭންކް ސަރަހައްދުގައި ހަމަނުޖެހުން އިތުރުވަމުންދާކަން ފާހަގަކުރެވެއެވެ.
