ރ. ދުވާފަރު ޞިއްޙީމަރުކަޒު ހޮސްޕިޓަލް ފެންވަރަށް އަޕްގްރޭޑްކުރުމަށް އިތުރުކުރެވޭ ޢިމާރާތުގެ މަސައްކަތް ކުރުމަށް އަލްޓެކް މޯލްޑިވްސް ޕްރައިވެޓް ލިމިޓެޑާ ރަސްމީކޮށް ހަވާލުކޮށްފިއެވެ.

މި މަޝްރޫޢަކީ ދުވާފަރުގެ ރައްޔިތުންނަށް ފުޅާ ދާއިރާއެއްގައި ޞިއްޙީ ޚިދުމަތްތައް ފޯރުކޮށްދިނުމަށްޓަކައި ސަރުކާރުން ކުރިއަށްގެންދާ މުހިންމު މަސައްކަތެކެވެ.

Ad by Hajj Corporation

މި ޕްރޮޖެކްޓްގެ އަގަކީ 25.5 މިލިއަން ރުފިޔާއެވެ. އަދި މި މަސައްކަތް ނިންމުމަށްޓަކައި 06 މަސް ދުވަހުގެ މުއްދަތެއް ވަނީ ކަނޑައަޅާފައެވެ.

މި މަޝްރޫޢުގެ ދަށުން ދުވާފަރު ޞިއްޙީ މަރުކަޒުގައި ޒަމާނީ ފެންވަރުގެ އޮޕަރޭޝަން ތިއޭޓަރ ކޮމްޕްލެކްސް އަކާއި އައިސީޔޫ (އިންޓެންސިވް ކެއަރ ޔުނިޓް) ޤާއިމުކުރެވޭނެއެވެ.

މީގެ އިތުރުން، މި ޢިމާރާތުގައި ނާސް ސްޓޭޝަނާއި ޕްރޮސީޖަރ ރޫމްގެ އިތުރުން މެޑިކަލް އަދި ނޮން-މެޑިކަލް ސްޓޯރ ރޫމްސް ވެސް ހިމެނެއެވެ.

މިކަންކަމުގެ ސަބަބުން މި ސަރަހައްދުގެ ރައްޔިތުންނަށް ބޭނުންވާ ޚާއްޞަ ފަރުވާތައް ހޯދުމަށް އެހެން ރަށްރަށަށް ދަތުރުކުރުން ކުޑަވެގެންދާނެއެވެ.

މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޯ ހެލްތު އިސްމާޢިލް ޢަބްދުﷲ އެވެ. އަލްޓެކް މޯލްޑިވްސް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ ޖެނެރަލް މެނޭޖަރ، ހުސެއިން ތަސްމީން އެވެ. އެއްބަސްވުމުގައި ސޮއިކުރެއްވިއިރު ދާޢިރާގެ އިއްޒަތްތެރި މެމްބަރ މުޙައްމަދު ޢަލީ ވެސް ވަޑައިގެންނެވިއެވެ.