ޕޮލިސް ކޮމިޝަނަރު އިސްމާއިލް ނަވީނާއި ފުލުހުންގެ އިތުރު އޮފިސަރުންތަކެއް ސަސްޕެންޑުކުރުމަށް ހުށަހެޅުމަށް ރައްޔިތުންގެ މަޖިލިހުގެ މާލިއްޔަތު ކޮމިޓީން މިއަދު ފާސްކޮށްފައިވާކަމަށް މައުލޫމާތު ލިބިއްޖެއެވެ.

Ad by Hajj Corporation

މި ނިންމުން ނިންމާފައިވަނީ މިއަދު ބޭއްވި ކޮމިޓީގެ ސިއްރު ބައްދަލުވުމެއްގައެވެ.

މި މައްސަލަ އާއި ގުޅޭ ގޮތުން މަޢުލޫމާތު ލިބޭ ގޮތުގައި، މި ނިންމުން ނިންމާފައިވަނީ ފުލުހުންގެ ވެލްފެއާ ކުންފުނި ކަމަށްވާ ޕޮލްކޯއާ ގުޅޭ ކޮރަޕްޝަންގެ ތުހުމަތުތަކަކާ ގުޅިގެންނެވެ.

މާލިއްޔަތު ކޮމިޓީން މި ތުހުމަތުތައް ބަލަމުންދާތާ ދުވަސްތަކެއް ވެފައިވާ ކަމަށް ވެސް މައުލޫމާތު ލިބެއެވެ.

މިއީ ސިއްރު ބައްދަލުވުންތަކެއްގައި ނިންމާފައިވާ ކަމަކަށް ވުމާއެކު، މެންބަރުން މި ކަމުގެ ތަފްސީލްތައް ވަނީ ސިއްރުކޮށްފައެވެ.

އެހެންނަމަވެސް މައުލޫމާތު ލިބިފައިވާގޮތުގައި ޖުމްލަ ހަތް އޮފިސަރެއް ސަސްޕެންޑުކުރުމަށް ހުށަހެޅުމަށް މާލިއްޔަތު ކޮމެޓީން ވަނީ ފާސްކޮށްފައެވެ. އެއިގެ ތެރޭގައި ހިމެނެނީ ސީޕީ އާއި ފަސް އެސިސްޓެންޓް ކޮމިޝަނަރުންނާއި އަދި ސުޕްރިޓެންޑެންޓެކެވެ.

މި ނިންމުން ތަންފީޒުކުރުމަށްޓަކައި ރައްޔިތުންގެ މަޖިލިހުގެ ތަޅުމުން ވޯޓު ނަގައި ފާސްކުރަން ޖެހޭނެއެވެ.