އެމްޑީޕީ މިވަގުތު މިދަނީ އުނދަގޫ ދުވަސްތަކެއް ތަޖުރިބާ ކުރަމުން ކަމަށާއި، އެހެންނަމަވެސް މި ހާލަތުން އެމްޑީޕީ އަރައިގަންނާނެކަމާމެދު އެމަނިކުފާނު ޝައްކު ނުކުރައްވާ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ، އެމްޑީޕީގެ އެތެރޭގައި ހިޔާލުތަފާތުވުންތައް ބޮޑުވެ، ޕާޓީއަށް ދަތި ދުވަސްތަކެއް ތަޖުރިބާ ކުރަމުންދާ މި ދަނޑިވަޅުގައި، ޕާޓީގެ އެއްބައިވަންތަކަމަށް ގޮވާލާ ފަރާތްތަކުގެ ނިޔަތާމެދުސުވާލު އުފެދޭކަމަށެވެ.އަދި މިހާރު އެމްޑީޕީގެ ވަރަށް ގިނަ މެންބަރުން އެ ބުނަމުންދަނީ މުހިންމީ ޕާޓީގެ ޔުނިޓީ ނުވަތަ އެއްބައިވަންތަކަންކަމަށް ރައީސް ނަޝީދު ވިދާޅުވިއެވެ.

Ad by Hajj Corporation

ނަމަވެސް، އެއްބައިވަންތަކަމަށް ގޮވާލާ ފަރާތްތަކުގެ ނިޔަތާމެދު ސުވާލު އުފެއްދެވުމަށްޓަކައި ރައީސް ނަޝީދު ވަނީ ދިވެހި ތާރީޚުގެ މިސާލެއް ނަންގަވައިފައެވެ.އެގޮތުން، 1933 ވަނަ އަހަރުގެ 'މޯޓަރު ބޯޓުގެ ގަޑުބަޑު' ގައި އަމީން ދީދީ ވިދާޅުވީ އެންމެ މުހިންމީ ކެބިނެޓްގެ އެއްބައިވަންތަކަން ކަމަށާއި، ކެބިނެޓްގެ އެކަކަށް ލިބޭ ގެއްލުމެއް އަނެކަކަށް ވެސް ލިބެންޖެހޭނެ ކަމަށް ކަމަށް އެމަނިކުފާނު ފާހަގަކުރެއްވިއެވެ.

ރައީސް ނަޝީދު ވިދާޅުވީ، ފަހުން ދެ ފަރީދާއި އަމީން ނޫން އެންމެންނަށް ޖެހުނީ މޯޓަރު ބޯޓުގައި ކޮޅުނބަށް ދާން ކަމަށާއި، އެތާނގައި ކެބިނެޓުގައި އަހަރެއްހާ ދުވަހު ތިބި ކަމަށާއި އެގޮތަށް ތިބި އިރު ދަރަވަންދޫގޭ ޙުސައިން ޞަލާޙުއްދީން ލިޔުއްވި ޅެން ބައިތެއް މިވަގުތަށް މުނާސަބު ކަމަށް އެމަނިކުފާނު ދެކެވަޑައިގަންނަވާ ކަމަށް ވިދާޅުވެ، އެ ޅެންބައިތު ވަނީ ހިއްސާ ކުރައްވާފައެވެ.

ރައީސް ނަޝީދުގެ މި ޕޯސްޓު ކުރައވާފައި ވަނީ އެމްޑީޕީ ގެ އެތެރޭގައި އޮތް ފިތުނައާ ދެކޮޅުވެރި ކަމުގެ ވާހަކަ ވަރަށް ގަދައަށް ދެކެވެމުން އަންނަ ދަނޑިވަޅެއްގައި ކަން ފާހަގަ ކޮށްލެވެއެވެ.

ކުރިން ޑިމޮކްރެޓްސް އުވާލަން ނިންމާ، ނަޝީދާއި އެ މަނިކުފާނުގެ ބައިވެރިން އެނބުރި އެމްޑީޕީއާ ގުޅިވަޑައިގެންނެވި ނަމަވެސް،ރައީސް ޞާލިޙާއި ރައީސް ނަޝީދުގެ ވާދަވެރިކަން ބޮޑުކޮށް ފެންނައިރު އެންމެ ރަނގަޅު ގޮތަކީ 2028 ވަނަ އަހަރު ބާއްވާ ރިޔާސީ އިންތިޚާބުގައި ރައީސް ޞާލިޙް ވެސް އަދި އެ މަނިކުފާނު ވެސް ވާދަ ނުކުރެއްވުން ކަމަށް ރައީސް ނަޝީދުވަނީ މީގެ ދުވަސް ކޮޅެއް ކުރިން ވިދާޅުވެފައެވެ.