ރަސްމާލޭގައި އީގަލް ހިލްސް އިން ހިންގަން ނިންމާފައިވާ މަޝްރޫއު އެމްޑީޕީ އަށް ވެސް ކަމުދާކަން މިހާރު ކުރިއަށްދާ އެ ޕާޓީގެ ކޮންގްރެސްއިން ހާމަވެއްޖެއެވެ.

މިހާރު ކުރިއަށްދާ އެމްޑީޕީގެ ކޮންގްރެސްގެ ތެރެއިން ބޭއްވި އިންވެސްޓްމަންޓް ފޯރަމްގައި އެ ޕާޓީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދު ވަނީ އީގަލް ހިލްސްގެ މަޝްރޫއު އައްޑޫއަށް ގެންދިއުމާމެދު ދެކެނީ ކިހިނެތްތޯ ސުވާލު ކުރައްވާފައެވެ.

Ad by Hajj Corporation

"މިސާލަކަށް އީގަލް ހިލްސުން އެ ޕްރޮޖެކްޓް އައްޑޫއަށް ގެންނަން އެ ކުންފުނިން އެއްބަސްވެއްޖިއްޔާ ކިހިނެތްބާ އައްޑޫ ސިޓީ ކައުންސިލާއި ރައްޔިތުން ދެކޭނީ،" ރައީސް ނަޝީދު ސުވާލު ކުރެއްވިއެވެ.

ރައީސް ނަޝީދުގެ އެ ސުވާލަށް ޖަވާބު ދެއްވަމުން އައްޑޫ ސިޓީގެ މޭޔަރު އަލީ ނިޒާރު ދެއްކެވި ވާހަކާގައި ވިދާޅުވެފައި ވަނީ މަޝްރޫއުގައި ކަންކަން ހިނގާނެ ގޮތް އައްޑޫ ރައްޔިތުންނަށް ސާފުކޮށް ބުނެދެވޭނަމަ އެ މަޝްރޫއަށް މަރުހަބާ ކިޔަން ތައްޔާރަށް ތިބި ކަމަށެވެ.

އޭގެ ފަހުން ރައީސް ނަޝީދު ވަނީ އީގަލް ހިލްސްގެ އަރިހުގައި އެ މަޝްރޫއު އައްޑޫއަށް ގެންދިއުމަށް އެދި އެމްޑީޕީން ލޮބީ ކުރުމަށް އެދޭތޯ ސުވާލު ކުރައްވާފައެވެ. އެ ސުވާލުގެ ޖަވާބުގައި މޭޔަރު ނިޒާރު ވަނީ އެކަމަށް އެދޭ ކަމަށް ވިދާޅުވެފައެވެ.

މިވާހަކަތަކުން އެމްޑީޕީ ވެސް އީގަލް ހިލްސް މަޝްރޫޢުއަށް ހިތް ޖެހިފައިވާކަން ހާމަވެއެވެ. އަދި އެ މަޝްރޫޢުއާއި ދެކޮޅަށް ވާހަކަދައްކަނީ ސިޔާސީ މަގްސަދެއްގައިކަން ވެސް ފާޅުވެއެވެ.