ގ. ކެނެރީގެ މުހައްމަދު ނަޝީދަކީ ރާއްޖެއާއި ދުނިޔޭގެ މީޑިއާތަކުގައި އޭނާ ވަރުގެ ޑިމޮކްރެޓިކް ވެރިއެއް  ނެތް ކަމަށް ދައްކައިގެން މުޅި ހަޔާތް ނޫސްތަކަށް ވިއްކަމުންދާ މީހެކެވެ. ނަޝީދަކީ ޑިމޮކްރެޓިކް ވެރިއެއް ކަމަށް ކުރިން ބައެއް މީހުންވެސް ދެކެމުންދިޔަ އެވެ. އެކަމަކު ނަޝީދުގެ ވެރިކަމުގައި ހޭވި ހަޑިއާއި ޖެހި ސަކަރާތްތަކުން އޭނާއަކީ ވެރިއެއް ނޫން ކަމާއި އެކްޓިވިސްޓެއް ކަމަށް ދެކޭ މީހުން މިއަދު ވަރަށް ގިނަ އެވެ.

ނަޝީދަކީ ދެކުނު އެފްރިކާގެ ޑިމޮކްރަސީގެ ބާނީ ނެލްސަން މަންޑޭލާ ފަދަ ވެރިއެއް ކަމަށް އޭނާ އަމިއްލައަށް ގަބޫލުކޮށް ބަޔަކަށް އެގޮތް ވިސްނައިދޭން މަސައްކަތް ކުރަމުންދާ މީހެކެވެ. ނަމަވެސް އެއީ ދުވަހަކުވެސް ނަޝީދަށް ލިބޭނެ ޝަރަފެއް ލަގަބެއް ނޫންކަން އޭނާގެ އުޅުންތަކާއި ގުޅުންތަކުން ވަނީ ސާބިތުކޮށްދީފަ އެވެ. ނެލްސަން މަންޑޭލާ ދެކުނު އެފްރިކާގެ ރައްޔިތުންގެ ހައްގުގައި ޖުމްލަކޮށް ކަޅު ނަސްލުގެ ހައްގުގައި 27 އަހަރު ޖަލުގައި ހޭދަކުރެއްވި އެވެ. އެކަމަކު ޒިންމާދާރު ކަމެއް ނެތް ސިޔާސީ ހަރަކާތްތަކުގައި ބައިވެރިވުމުން ޖަލަށްލައި، ކޮންމެ ފަހަރަކު ނަޝީދުގެ ފިނޑިކަން ދިވެހިން ވަނީ ދެކެފަ އެވެ އެންމެ ފަހުން ރައީސް އަބްދުﷲ ޔާމީންގެ ވެރިކަމުގައި ނަޝީދު 13 އަހަރަށް ޖަލަށްލުމުން ކުޑަ ދުވަސްކޮޅަކު ޖަލުގައި ހުންނެވުމަށްފަހު، މައިބަދައަށް އަނިޔާވި ކަމަށް ހަދައި، އިނގިރޭސިވިލާތަށް ދިޔަ ގޮތަށް ޔާމީންގެ ދައުރު ނިމެންދެން ނަޝީދު ހުރީ އެތަނުގައި ފިލަ އެވެ.

Ad by Hajj Corporation

ރައްޔިތުންގެ މަޖިލީހުގެ މެންބަރުން އިންތިހާބުވާ ޕާޓީ ނޫން އެހެން ޕާޓީތަކަށް ރިޝްވަތުގެ ހުތުރު ފައިސާގައި ގަނެވިއްކުމުގެ މުއާމަލާތް ފަށައި، އެ ހުތުރު ވިޔަފާރި ރާއްޖެއަށް ތައާރަފްކުރި މީހަކީވެސް ނަޝީދު އެވެ. އޭނާގެ ވެރިކަމުގައި އޭރުގެ އިދިކޮޅު މެންބަރުންނަށް މިލިއަނުން ފައިސާ ދީގެން ރިޝްވަތު އާންމުކުރި ވެރިޔަކީވެސް ނަޝީދު އެވެ.

ވެރިކަމުގައި ހުންނެވިއިރު ނަޝީދު ނުރުހޭ ގޮތަށް ހުކުމްތައް ނެރުއްވަމުން ގެންދެވި ގާޒީއަކު ރަހީނުކޮށް ޖަލުގައި ބޭއްވީ ގާނޫނުއަސާސީއާއި ގާނޫނުތަކާ ކަނޑައެޅިގެން ޚިލާފަށެވެ. ގާޒީ ދޫކޮށްލަން ކޯޓުތަކުން ނެރުނު އަމުރުތަކަށްވެސް ނަޝީދު ވަނީ ގޮންޖަހާފަ އެވެ. ފަނޑިޔާރުން ވަގަށް ނެގުމާއި، އިދިކޮޅު ސިޔާސީ ލީޑަރުންނާއި ނޫސްވެރިން ހައްޔަރުކޮށް ޖަލަށްލުމަކީ ހުދުމުހުތާރު ވެރިން ކުރަމުންދާ ކަމަކަށްވާއިރު ނާތަހުޒީބު އެފަދަ ހުރިހާ ކަމެއް ނަޝީދުގެ ވެރިކަމުގައިވެސް ފެނިގެން ދިޔަ އެވެ.

އެއްވެސް މީހަކީ ގާނޫނަށް ވުރެ މަތީގައި ހުރެވޭނެ މީހަކަށް ނުވާތީ ދައުލަތުގެ ބާރުކަނޑުވާލުމުގެ އެއްވެސް ހައިސިއްޔަތެއް އެއްވެސް މީހަކަށް ލިބިގެން ނުވެ އެވެ. އެކަމަކު ނަޝީދުގެ ފިނޑިކަމުން އޭނާ ވަނީ ތަހުގީގީ އިދާރާތަކަށް ހާޒިރުވާން އެންގުމުން ރާއްޖޭގައި ހުންނަ އެކުވެރި ދައުލަތެއްގެ ހައިކޮމިޝަން ތެރެއަށް ވަދެ ހިމާޔަތް ހޯދާފަ އެވެ. މިފަދަ އެހެން މައްސަލައެއްގައި، އަތޮޅު ތެރޭގެ ރަށަކަށް ގޮސް އަރިސް ބޭފުޅެއްގެ އިމާރާތެއްގައި ފިލާ އޮއްވާ، އެފަހަރުވެސް ގާނޫނުގެ ކުރިމައްޗަށް ނަޝީދު ގެނައީ ފުލުހުންގެ އަދަގޮނޑީގައި ބާއްވައިގެންނެވެ.

ރައްޔިތުންގެ މަޖިލީހުގެ ރައީސް ކަމުގައި މެންބަރުންގެ އަބުރު ނަގާލައި، މެންބަރުންނަކީ ސްކޫލު ދަރިވަރުން ފަދަ ތުއްތު ކުދިންތަކަކަށް ހަދައި، އަދަބެއްގެ ގޮތުގައި ކުޑަކަކޫ ޖަހަން މެންބަރުންނަށް އެންގި ހަމައެކަނި މަޖިލިސް ރައީސަކީވެސް ނަޝީދު އެވެ. ނަޝީދު ނިސްބަތްވާ ޕާޓީގެ މަޖިލިސް މެންބަރުންގެ އަގުލަބިއްޔަތުން، މަޖިލީހުގެ ރައީސްކަމުން އޭނާ ދުރުކުރަން އިތުބާރު ނެތް ކަމުގެ މައްސަލަ ހުށަހެޅުމާއެކު، މަޖިލީހުގެ އިޖުރާތު އެއްކޮށް ފުނޑާލި މީހަކީވެސް ނަޝީދު އެވެ. މަގާމުގެ ދަހިވެތިކަމުގައި، މަޖިލީހުގެ ރައީސްގެ އިތުބާރު ނެތް ކަމުގެ މައްސަލަ އެޖެންޑާ ނުކޮށް، ދައުލަތުގެ އެއްބާރު މުޅިން ހުއްޓުވާލި ވެރިޔަކީ ވެސް ނަޝީދު އެވެ.

ނަޝީދަށް އިތުބާރުކޮށް ދިވެހި ރައްޔިތުން ވެރިކަން ހަވާލުކުރުމުން ވެރިކަން ކުރީވެސް ހުރިހާ ދިވެހިން ލަދުގަންނަންޖެހޭ ފަދަ ހުތުރު ގޮތްގޮތަށެވެ. ބޭރަށް ކުރި ކޮންމެ ދަތުރެއް ނިންމާލާފައިވަނީ ދިވެހިންގެ ދީނަށް ފުރައްސާރަވާ ބަސްތަކެއް ބޭނުންކުރުމަށްފަހު އެވެ. ވެރިކަމުގައި މުޅި ކެބިނެޓް އިސްތިއުފާ ދެއްވުމަށް އެންގި  ހަމައެކަނި ރައީސަކީވެސް ނަޝީދު އެވެ.

ވެރިކަން ކުރުމަށާއި ގައުމުގައި އޮތް ދަރަނި ޚަލާސްކުރާނެ ގޮތެއް ނޭނގި ބޮޑެތި ގޯސްތައް ހެދުމަށްފަހު ދައުރުގެ މެދުތެރެއިން އަމިއްލައަށް ވެރިކަން ދޫކޮށްލި ހަމައެކަނި ވެރިޔަކީވެސް ނަޝީދު އެވެ. އެކަމަކު ޖެހިގެން އައި ދުވަހު ނަޝީދުގެ އޯޑަރަށް އޭނާގެ އެކްޓިވިސްޓުން ވަނީ ގައުމުގެ އެތައް މިތަނުގައި ހުޅުޖަހައި 200 މިލިއަން ރުފިޔާއަށް ވުރެ ބޮޑު ގެއްލުމެއް ދައުލަތަށް ދީފަ އެވެ.

ނަޝީދު ފަދަ، މާޒީގައި ހުތުރު އެތައް ކަމެއް ކޮށްފައިވާ މީހަކު ނިކުމެ މަންޑޭލާގެ ލަގަބު ހޯދަން އުޅުމަކީ ބޮޑު ޖޯކެކެވެ. ދައުލަތުގެ އިދާރާތަކަށް ފިލައިގެން އުޅުނު މީހަކު ޑިމޮކްރަސީގެ ޗެމްޕިއަނެއް ކަމަށް ދައުވާކުރުމަކީ މަންޑޭލާ ފަދަ ބޭފުޅުންނަށް ކުރެވޭ މަލާމާތެކެވެ. ނަޝީދުގެ ސިޔާސީ މަސައްކަތްތަކަށް ކޮންމެހެން ނަމެއް ބޭނުންވާނަމަ އޭނާއަށް އެންމެ ހައްގު ނަމަކީ "މުގާބޭ" ކަމަށް ވާދަވެރި ސިޔާސީ ފަރާތްތަކުން ދެކެ އެވެ.