ޔަހޫދީން ހިންގަމުންދާ ލާއިންސާނީ ޖަރީމާތަކަށް ރައްދު ދިނުމަކީ ޙިޒްބުاللهއަށް ލިބިގެންވާ ޙައްޤެއް ކަމުގައި އެ ޖަމާޢަތުގެ ވެރިޔާ ނަޢީމް ޤާސިމް ވިދާޅުވެއްޖެއެވެ.

އޭނާ މި މޭރުމުން ވިދާޅުވެ، ޔަހޫދީންނަށް އިންޒާރު ދެއްވާފައި މިވަނީ، ޔަހޫދީން ދާދިފަހުން ދިން ނިރުބަވެރި ޙަމަލާތަކެއްގައި އެ ޖަމާޢަތުގެ އިސް ކޮމާންޑަރެއް ޝަހީދު ކޮށްލުމާ ގުޅިގެންނެވެ. ޤާސިމް މި މޭރުމުން ވާހަކަދެއްކެވުމާއެކު، ޔަހޫދީންނާއި ޙިޒްބުاللهގެ މުޖާހިދުންނާ ދެމެދު އަނެއްކާވެސް ލޭއޮހޮރުވުން ބޮޑު ހަނގުރާމައެއް ފެށިދާނެ ކަމުގެ ބިރު ވަނީ ހީވެފައެވެ.

ޙިޒްބުاللهއަކީ ލުބްނާންގެ ސިޔާސީ މައިދާނުގައި ހަރަކާތްތެރިވާ މުޖާހިދުންގެ ޖަމާޢަތެކެވެ. ޔަހޫދީ ފައުޖުން ޙިޒްބުاللهގެ އަސްކަރީ ގޮފީގެ އިސް ކޮމާންޑަރު، ހައިޘަމް ޢަލީ އަލް-ޠަބްޠަބައީ ޝަހީދު ކޮށްލާފައިވަނީ ލުބްނާންގެ ވެރިރަށް ބައިރޫތުގެ ރަށްބޭރުގެ ސަރަޙައްދަކަށް ނޮވެންބަރު 23ވަނަ ދުވަހު ދިން ނިރުބަވެރި ޙަަމަލާއެއްގައެވެ. ލުބްނާންގެ ޢާންމު ރައްޔިތުންގެ ނަސްލުހޭދު ކުރުމަށް ޔަހޫދީ ފައުޖުން ހުސްވި އަހަރު ޤަތުލުޢާންމަކާ އެއް ފަދަ ލާއިންސާނީ ޖަރީމާތަކެއް ހިންގާފައިވާއިރު، ޠަބްޠަބައީ ޝަހީދު ކޮށްލުމަށް ދިން ޙަމަލާއަށް ފަހު އެ ޤައުމުގެ ޢާންމުންނާ ދެކޮޅަށް އަލުން ލާއިންސާނީ ޖަރީމާތަކެއް ހިންގަން ފަށާފާނެ ކަމުގެ ބިރު ވަނީ ބޮޑުވެފައެވެ.

ޓީވީ މެދުވެރިކޮށް ލުބްނާންގެ ރައްޔިތުންނާ މުޚާޠަބު ކުރައްވައި ވާހަކަފުޅު ދައްކަވަމުން ޤާސިމް ވިދާޅުވީ ޠަބްޠަބައީ ޝަހީދު ކޮށްލުމަށް ދިން ޙަމަލާގެ ބަދަލު ޙިޒްބުاللهން ހިފާނެ ކަމުގައެވެ. ނަމަވެސް، އެ ކަން ކުރާނީ، އެ ކަމަށް އެންމެ މުނާސަބު ވަގުތުގައި ކަމުގައި ވެސް އޭނާ ވިދާޅުވިއެވެ. އަދި، ޙިޒްބުاللهއާ ދެކޮޅަށް ކަމަށް ބުނެ ލުބްނާންގެ ޢާންމު ރައްޔިތުން ދިރިއުޅޭ ރަށްތަކަށް ބޮންއަޅާނެ ކަމުގެ އިންޒާރު ޔަހޫދީ ދެމުން ދިޔަ ނަމަވެސް، އެ ފަދަ އިންޒާރުތަކަށް ޙިޒްބުاللهން ފަސްނުޖެހޭނެ ކަމުގައިވެސް ޤާސިމް ވިދާޅުވިއެވެ.

Ad by Hajj Corporation