ދައުލަތުގެ މީޑިއާ، ޕީއެސްއެމްގެ މެނޭޖިން ޑިރެކްޓަރުގެ މަގާމުން އިބްރާހީމް ނަސްރީން އިސްތިއުފާދެއްވައިފިއެވެ.

ނަސްރީން މަގާމުން އިސްތިއުފާދެއްވިކަން "މެންދުރު ޓީވީ" އަށް ކަށަވަރުވެފައިވާއިރު، އޭނާ މަގާމުން އިސްތިއުފާދެއްވާފައި ވަނީ ސަރުކާރުގެ އެހެން މަގާމަކާ ހަވާލުވެވަޑައިގަތުމަށް ކަމަށް ވެއެވެ.

Ad by Hajj Corporation

ބައެއް މަސްދަރުތަކުން މައުލޫމާތުދޭ ގޮތުގައި  ނަސްރީން މިހާރު ވަނީ ޔޫތު މިނިސްޓްރީގެ މަގާމަކަށް ބަދަލުކޮށްފައެވެ. އެހެންމަވެސް އޭނާ ބަދަލުކުރި މަގާމު އަދި ސާފުވާގޮތް ވަނީ ނުވެފައެވެ.

ފާހަގަކޮށްލަން ޖެގޭ ގޮތުގައި މިއީ ފާއިތުވީ ދެ އަހަރެއްހައި ދުވަހުގެ ތެރޭގައި ޕީއެސްއެމްގެ އެމްޑީ ބަދަލުވާނެ ތިންވަނަ ފަހަރެވެ. މި ސަރުކާރުން ވެރިކަމާ ހަވާލުވިފަހުން އެންމެފުރަތަމަ ޕީއެސްއެމްގެ އެމްޑީ އަކަށް އައްޔަންކުރެއްވީ ޒީނާ ޒާހިރުއެވެ. އޭނާ އެ މަގާމުން އިސްތިއުފާދެއްވީ  މިދިޔަ އަހަރުގެ އޮގަސްޓު މަހުގެ 24 ވަނަ ދުވަހުއެވެ.

އެފަހުން ޕީއެސްއެމްގެ އެމްޑީގެ މަގާމާ ހަވާލުވެވަޑައިގަތީ މުހައްމަދު ސައީދުއެވެ. އެހެންނަމަވެސް މިދިޔަ އަހަރުގެ ޑިސެމްބަރު މަހުގެ 19 ވަނަ ދުވަހު އެ މަގާމުން އޭނާ ވަނީ އިސްތިއުފާދެއްވާފައެވެ.

ސައީދު އިސްތިއުފާދެއްވުމުން ޕީއެސްއެމްގެ އެމްޑީގެ މަގާމާ ހަވާލުވެވަޑައިގަތް ނަސްރީން މިހާރު އެ މަގާމުން އިސްތިއުފާދެއްވާފައިވާއިރު ނަސްރީން އަކީ ޕީއެސްއެމްގައި ޚިދުމަތް ކުރައްވާތާ 20 އަހަރަށް ވުރެ ގިނަ ދުވަސް ވެފައިވާ ބޭފުޅެކެވެ. އޭނާ މަސައްކަތް ފެއްޓެވީ ގްރެފިކްސްގެ ދާއިރާއިން ކަމަށްވާއިރު، އެކި މަގާމުތައް ފުރުއްވައި، ޕީއެސްއެމްގެ ކޮމާޝަލް ހެޑްއަކަށް ވެސް ހުންނެވިއެވެ.

ނަސްރީން ވަނީ މެލޭޝިއާގެ ލިމްކޮކް ޔުނިވާސިޓީން ބެޗްލާސް ޑިގްރީ ހާސިލުކުރައްވައި، ތައިލެންޑުގެ ކޮލެޖް އޮފް އިނޮވޭޝަން އެޓް ތަމަސަޓް ޔުނިވާސިޓީން ސާވިސް އިނޮވޭޝަންގެ ދާއިރާއިން މާސްޓާސް ޑިގްރީ ހާސިލުކުރައްވައިފައެވެ. އަދި ޕީއެޗްޑީ ފައްޓަވައި، މިހާރު މަސައްކަތް ކުރައްވަމުން ގެންދަވަނީ އެންމެ ފަހު މަރުހަލާގައެވެ.