އިނގިރޭސި ޕްރިމިއާ ލީގުގައި ޗެލްސީގެ ދަނޑު، ސްޓެމްފޯޑް ބްރިޖްގައި ކުޅުނު ހޫނު މެޗުގައި ޗެލްސީ އާއި އާސެނަލް 1-1 ގެ ނަތީޖާއަކުން އެއްވަރުވެއްޖެއެވެ. މިމެޗު ފެށުމުގެ ކުރިން ޗެލްސީއިން ވަނީ އާސެނަލްގެ ޓީމަށް އެޓީމު ހޯދާފައިވާ އިންޓަރނޭޝަނަލް ޓްރޮފީތައް ބޮޑު ބެނާއަކުން ދައްކާލާފައެވެ.

ފޯރިގަދަ އަދި ހަމަނުޖެހުން ގިނަ މި މެޗުގައި ޖުމްލަ 7 ރީނދޫކާޑެއް ވަނީ ދައްކާފައެވެ. މެޗުގެ ފުރަތަމަ ހާފުގައި ޗެލްސީގެ މިޑްފީލްޑަރު މޮއިސެސް ކައިސޭޑޯ އަށް ވަނީ ސީދާ ރަތް ކާޑެއް ދައްކައި ދަނޑުން ބޭރުކޮށްލާފައެވެ. ނަތީޖާއެއްގެ ގޮތުން ޗެލްސީ އަށް ޖެހުނީ މެޗުގެ ބޮޑުބައި 10 ކުޅުންތެރިންނާއެކު ކުޅޭށެވެ. މިމެޗުގައި މެޗުގެ ބޮޑުބައި އެކަކު މަދުކޮށް ކުޅުނު ޗެލްސީގެ ފަރާތުން ވަނީ މޮޅުކުޅުމެއް ފެނިގެންގޮސްފައެވެ.

Ad by Hajj Corporation

އެކަކު މަދުކޮށް ކުޅެން ޖެހުނު ނަމަވެސް ޗެލްސީން ވަނީ ދެވަނަ ހާފް ފެށިތަނާހެން ލީޑު ނަގާފައެވެ. މެޗުގެ 48 ވަނަ މިނެޓުގައި ޗެލްސީގެ ޑިފެންޑަރު ޓްރެވޯ ޗަލޯބާ ވަނީ ކޯނަރަކުން ގޯލެއް ޖަހައި ޗެލްސީ އަށް ލީޑު ހޯދައިދީފައެވެ. ނަމަވެސް އާސެނަލް އިން ވަގުތު ނުދީ މެޗުގެ ނަތީޖާ ހަމަހަމަކުރިއެވެ. މެޗުގެ 59 ވަނަ މިނެޓުގައި ސަކާގެ ހުރަހަކުން މިކެލް މެރީނޯ ވަނީ އާސެނަލް އަށް އެއްވަރުކޮށްދިން ގޯލު ކާމިޔާބުކޮށްފައެވެ.

ދެ ޓީމުން ވެސް މެޗު ކާމިޔާބުކުރަން ގިނަ މަސައްކަތްތަކެއް ކުރި ނަމަވެސް، އިތުރު ގޯލެއް ނުޖެހި މެޗު ނިމިގެން ދިޔައީ 1-1 ގެ ނަތީޖާއަކުންނެވެ.

މި އެއްވަރުވުމާއެކު އާސެނަލް ވަނީ ޕްރިމިއާ ލީގުގައި ބަލިނުވެ ދެމިއޮތް މެޗުތަކުގެ އަދަދު 10 އަށް އިތުރުކޮށްފައެވެ. އަދި އެ ޓީމު މިހާރު ވެސް ލީގު ތާވަލުގެ އެއްވަނައިގައި އޮތީ އެންމެ ގާތުން ވާދަކުރާ ސިޓީއަށްވުރެ ފަސް ޕޮއިންޓު ކުރީގައެވެ.