ޕްރިމިއާ ލީގުގައި ރޭ ކުޅުނު މެޗުގައި ޒިއާން ފްލެމިންގް ފަހުވަގުތު ކާމިޔާބުކޮށްދިން ލަނޑާއެކު، 10 ކުޅުންތެރިންނާއެކު ކުޅުނު ޗެލްސީއާ ދެކޮޅަށް 1-1 އިން ބާންލީ އެއްވަރުކޮށްފިއެވެ. މި ނަތީޖާއާއެކު ލީގުގައި ދެމިއޮތުމަށް ބާންލީން ކުރަމުންދާ މަސައްކަތަށް ވަނީ އިތުރު އުންމީދެއް ލިބިފައެވެ.

ސްޓެމްފޯޑް ބްރިޖުގައި ކުޅުނު މި މެޗުގެ ހަތަރުވަނަ މިނެޓުގައި ޕެޑްރޯ ނެޓޯ ދިން ބޯޅައަކުން ޖޮއާއޮ ޕެޑްރޯ ވަނީ ޗެލްސީއަށް ކުރިހޯދައިދީފައެވެ. މިއީ އޭނާ މި ސީޒަނުގައި ޕްރިމިއާ ލީގުގައި ކާމިޔާބުކުރި 11 ވަނަ ލަނޑެވެ. ނަމަވެސް، މި ލަނޑަށްފަހު ބާންލީން ވަނީ ވަރުގަދައަށް ދިފާއުކޮށް، ޗެލްސީގެ ހަމަލާތައް ހުއްޓުވާފައެވެ.

Ad by Hajj Corporation

މެޗުގެ އޮއިވަރު ބަދަލުވެގެން ދިޔައީ 72 ވަނަ މިނެޓުގައި ޗެލްސީގެ ވެސްލީ ފޮފާނާ، ބާންލީގެ ޖޭމްސް ވޯޑް-ޕްރައުސްއަށް ކުރި ނުރައްކާތެރި ފައުލަކާ ގުޅިގެން ދެވަނަ ރީނދޫ ކާޑާއެކު ރަތް ކާޑު ދައްކައި ދަނޑުން ފޮނުވާލުމުންނެވެ. މި ފުރުސަތުގެ ބޭނުން ހިފުމަށް ބާންލީން ކުރިއަށް ޖެހި ހަމަލާތައް ވަރުގަދަކުރިއެވެ.

ބާންލީން މެޗުގެ ނަތީޖާ އެއްވަރުކުރީ އިތުރު ވަގުތުގެ ތިންވަނަ މިނެޓުގައެވެ. ވޯޑް-ޕްރައުސް ނަގައިދިން ހުރަހަކުން ޒިއާން ފްލެމިންގް ވަނީ ވަރަށް ހުސްކޮށް ހުރެ ބޮލުން ފޮނުވާލި ހަމަލާއަކުން ޗެލްސީގެ ގޯލްކީޕަރު ރޮބާޓް ސަންޗޭޒް ބަލިކޮށްފައެވެ. މެޗުގެ ފަހު ސިކުންތުކޮޅުގައި ޖެކޮބް ބްރޫން ލާސަންއަށް މެޗުން މޮޅުވާނެ ރަނގަޅު ފުރުސަތެއް ލިބުނު ނަމަވެސް، އޭނާ ފޮނުވާލި ބޯޅަ ދިޔައީ ގޯލުގެ މަތިން ބޭރަށެވެ.

ތަފާސްހިސާބުތަކަށް ބަލާއިރު، ޗެލްސީއަށް މި ސީޒަނުގައި އަމިއްލަ ދަނޑުގައި މޮޅުވެފައި އޮތް މެޗުތަކުން 17 ޕޮއިންޓް ވަނީ ގެއްލިފައެވެ. މިއީ 1995-96 ވަނަ އަހަރުގެ ސީޒަނަށްފަހު އެ ޓީމަށް މިފަދަ ގޮތަކަށް އެންމެ ގިނަ ޕޮއިންޓް ގެއްލުނު ފަހަރެވެ. އަނެއްކޮޅުން ބާންލީން ވަނީ އެންމެ ފަހުން ރަށުން ބޭރުގައި ކުޅުނު 6 މެޗުގެ ތެރެއިން ބަލިވަމުން ދިޔަ ހާލަތްތަކުގައި 6 ޕޮއިންޓް ހޯދާފައެވެ.