ޗެލްސީގެ މެދުތެރެއަށް ކުޅޭ އެކުލަބުގެ އެންމެ މުހިންމު ކުޅުންތެރިޔާ އާޖެންޓީނާގެ އެންޒޯ ފެނާންޑޭޒްގެ އަމަލުތަކާއި ދައްކަމުންދާ ވާހަކަތަކުގެ ސަބަބުން އެ ކްލަބުގެ ޑްރެސިން ރޫމްގެ ތެރޭގައި ބޮޑެތި ނުތަނަވަސްކަމެއް އުފެދިއްޖެއެވެ. ރިޕޯޓްތައް ބުނާގޮތުގައި މި ހާލަތުގެ ފައިދާ ނުސީދާ ގޮތެއްގައި ރެއާލް މެޑްރިޑަށް ލިބުމުގެ ފުރުސަތު މިހާރު ވަނީ ބޮޑުވެފައެވެ.

އޭއެސް (AS) އިން ރިޕޯޓްކޮށްފައިވާ ގޮތުގައި، ފާއިތުވި ހަފުތާތަކުގައި އެންޒޯ ކަންތައްތައް ކުރަމުންދާ ގޮތުން ޗެލްސީގެ ގިނަ ކުޅުންތެރިންތަކެއް ތިބީ އޭނާއާ މެދު ވަރަށް ބޮޑަށް ހިތްހަމަނުޖެހިފައެވެ. މި ހިތްހަމަނުޖެހުންތަކުގެ މައިގަނޑު ސަބަބަކީ ކްލަބު ދޫކޮށް އެހެން ތަނަކަށް ބަދަލުވުމުގެ ޝައުގުވެރިކަން އޭނާ ފާޅުކުރަމުންދިއުމާއި، ވަކިން ހާއްސަކޮށް ރެއާލް މެޑްރިޑަށް އޭނާ ކުރާ ތާއީދު އާންމުކޮށް ހާމަކުރުމެވެ.

Ad by Hajj Corporation

މިދިޔަ ދުވަސްތަކުގައި ދިން އިންޓަވިއުއެއްގައި އެންޒޯ ބުނެފައިވަނީ، "އަހަރެން ސްޕެއިންގައި ދިރިއުޅެން ބޭނުން. އަހަރެން މެޑްރިޑްދެކެ ވަރަށް ލޯބިވޭ، އެ ސިޓީން ހަނދާންކޮށްދެނީ ބުއެނޮސް އައިރެސް މަތިން. އަހަރެން މެޑްރިޑްގައި ދިރިއުޅޭނަން. ފުޓްބޯޅަ ކުޅުންތެރިއަކަށް އޭނާ ބޭނުން ކޮންމެ ތަނެއްގައި ދިރިއުޅެވިދާނެ،" މިފަދައިންނެވެ. މި ވާހަކަތަކުގެ ސަބަބުން ޗެލްސީގެ މެނޭޖްމަންޓާއި ކުޅުންތެރިންގެ މެދުގައި ވަނީ ބޮޑު ސުވާލުތަކެއް އުފެދިފައެވެ.

ކްލަބުގެ އެތެރޭގެ މަސްދަރުތަކުން ބުނާގޮތުގައި، ޗެލްސީ މިހާރު އޮތް ދަތި ހާލަތުގައި އެންޒޯގެ މިފަދަ ވާހަކަތަކަކީ ކްލަބަށް އޮތް ވަފާތެރިކަން ކުޑަކަމުގެ ހެއްކެކެވެ. މީގެ އިތުރުން މެޗުތަކުގެ ތެރޭގައި ޓީމުގެ އެހެން ކުޅުންތެރިންނާ ދިމާލަށް ހަޅޭއްލަވައި، ފާޑުކިޔުންތައް އަމާޒުކުރަމުންދާ ކަމަށްވެސް ރިޕޯޓްތައް ބުނެއެވެ. މިގޮތުން ޕީއެސްޖީއާ ދެކޮޅަށް ކުޅުނު މެޗުގައި ގޯލްކީޕަރު ފިލިޕް ޖޯގެންސަންއާ ދެމެދު ހިނގި ހޫނު ބަހުގެ ހަމަލާތައް ފާހަގަކޮށްލެވެއެވެ.

ޗެލްސީގެ މާލީ ހާލަތު މިހާރު އޮތް ގޮތުންނާއި ޕްރިމިއާ ލީގުގެ ތާރީހުގައިވެސް އެ ކްލަބަށް ނުލިބޭ ފަދަ ބޮޑު ގެއްލުމަކާ ކުރިމަތިލާން ޖެހިފައިވާ މި ދަނޑިވަޅުގައި، ޓީމުގެ އެއްބައިވަންތަކަން ދެމެހެއްޓުމަކީ މުހިންމު ކަމެކެވެ. އެންޒޯގެ ކޮންޓްރެކްޓް 2032 ވަނަ އަހަރާ ހަމައަށް އޮތް ނަމަވެސް، މިހާރު އުފެދިފައިވާ މައްސަލަތަކުގެ ސަބަބުން އޭނާ ވިއްކާލުމާ މެދު ވިސްނަން ޗެލްސީއަށް މަޖުބޫރުވެދާނެއެވެ.

މި ހުރިހާ ކަމެއް މިހެން ހުރިއިރު، ރެއާލް މެޑްރިޑުން ދަނީ މި ހާލަތު ވަރަށް ގާތުން ބަލަމުންނެވެ. މެދުތެރެއަށް ކުޅޭ ހުނަރުވެރި ޒުވާން ކުޅުންތެރިން ހޯދުމަކީ ރެއާލްގެ މުސްތަގުބަލުގެ ޕްލޭންގައި ހިމެނޭ ކަމަކަށްވާއިރު، އެންޒޯއަކީ އެ ކްލަބަށް ވަރަށް ބޮޑަށް ފެތޭ ކުޅުންތެރިއެއް ކަމަށް ގިނަ ބަޔަކު ގަބޫލުކުރެއެވެ.