ޔޫއެފާ ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި ރެއާލް މެޑްރިޑްގެ ދަނޑުގައި ކުޅުނު ފޯރިގަދަ މެޗު 2-1 ގެ ނަތީޖާއަކުން ބަޔާން މިއުނިކުން ކާމިޔާބުކޮށްފިއެވެ. ރެއާްލްގެ ސެންޓިއާގޯ ބާނަބިއު ދަނޑުގައި ކުޅުނު މި މެޗުގައި ބަޔާންގެ ލަނޑުތައް ޖަހައިދިނީ ލުއިސް ޑިއާޒް އަދި ހެރީ ކޭން އެވެ. ރެއާލް މެޑްރިޑްގެ ހަމައެކަނި ލަނޑު ކާމިޔާބުކޮށްދިނީ ކީލިއަން އެމްބާޕޭ އެވެ.

މެޗުގެ ކުރީކޮޅު ބަޔާން މިއުނިކުން ވަނީ ގިނަ ފުރުސަތުތަކެއް ތަނަވަސްކޮށްފައެވެ. އެގޮތުން ހެރީ ކޭން ތަނަވަސްކޮށްދިން ފުރުސަތަކުން ޑަޔޮޓް އުޕަމެކާނޯ ފޮނުވާލި ހަމަލާ ރެއާލްގެ އަލްވާރޯ ކަރޭރަސް ވަނީ ގޯލުގެ ރޮނގުމަތިން ސަލާމަތްކޮށްފައެވެ. ބަޔާން އިން މެޗުގެ ލީޑު ނެގީ 41 ވަނަ މިނެޓުގައެވެ. މިއީ ލުއިސް ޑިއާޒް ވަރަށް ރީތިކޮށް ގޯލުގެ ތެރެއަށް ފޮނުވާލައިގެން ކާމިޔާބުކުރި ލަނޑެކެވެ.

Ad by Hajj Corporation

ދެވަނަ ހާފު ފެށިގެން 20 ސިކުންތުގެ ތެރޭގައި ބަޔާން އިން ވަނީ ދެވަނަ ލަނޑެއް ޖަހައި ލީޑު ފުޅާކޮށްފައެވެ. މައިކަލް އޮލީސޭ ތަނަވަސްކޮށްދިން ފުރުސަތަކުން މި ލަނޑު ކާމިޔާބުކޮށްދިނީ އަނިޔާއިން އެނބުރި އައި ހެރީ ކޭން އެވެ. މިއާއެކު ކޭން ވެފައިވަނީ ރެއާލް މެޑްރިޑާ ދެކޮޅަށް ކުޅުނު ޖެހިޖެހިގެން ހަތަރު މެޗުގައި ލަނޑު ޖެހުމުގައި ނުވަތަ އެސިސްޓް ކުރުމުގައި ބައިވެރިވި މަދު ކުޅުންތެރިންގެ ތެރެއިން އެކަކަށެވެ.

ރެއާލް މެޑްރިޑުން މެޗުގެ ތެރެއަށް އެނބުރި އައުމަށް ކުރި މަސައްކަތުގައި އެމްބާޕޭ އާއި ވިނީޝިއަސް ޖޫނިއާ ފޮނުވާލި ނުރައްކާތެރި ހަމަލާތަކެއް ބަޔާންގެ ކީޕަރު މެނުއަލް ނޯޔާ ވަނީ ހުށިޔާރުކަމާއެކު ދިފާއުކޮށްފައެވެ. ނަމަވެސް މެޗުގެ ފަހުކޮޅު ޓްރެންޓް އެލެގްޒެންޑާ އާނޯލްޑް ނަގައިދިން ހުރަހަކުން އެމްބާޕޭ ވަނީ ލަނޑެއް ޖަހައި ފަރަގު ކުޑަކޮށްދީފައެވެ. މިއީ މި ސީޒަނުގެ ޗެމްޕިއަންސް ލީގުގައި އެމްބާޕޭ ކާމިޔާބުކުރި 14 ވަނަ ލަނޑެވެ.

ތަފާސްހިސާބުތަކަށް ބަލާއިރު، ދެ ޓީމުގެ ފަރާތުންވެސް 20 ހަމަލާ ފެނިގެންދިޔަ މި މެޗަކީ ފޯރިގަދަ ކުރިމަތިލުމެކެވެ. މި ނަތީޖާއާއެކު ބަޔާން އިން އަމިއްލަ ދަނޑުގައި ކުޅޭ ދެވަނަ ލެގަށް ކުރިމަތިލާނީ އެއް ލަނޑުގެ އެޑްވާންޓޭޖަކާއެކުގައެވެ.