ޔުއެފާ ޗެމްޕިއަންސް ލީގުގެ ކެމްޕޭން ފަށަމުން ބަޔާން މިއުނިކުން ދެވަނަ ހާފުގައި ޖެހި ފަސް ލަނޑާއެކު، 5-0 ގެ ތަފާތު ބޮޑު ނަތީޖާއަކުން ބޯޑޯ/ގްލިމްޓް ބަލިކޮށްފިއެވެ. މެޗުގެ ދެވަނަ ހާފުގައި މައިކަލް އޮލީސޭ ވަނީ ދެ ލަނޑު ޖަހައި މޮޅު ކުޅުމެއް ދައްކާފައެވެ.

މެޗުގެ ފުރަތަމަ ހާފުގައި ބަޔާނަށް ލަނޑެއް ނުޖެހި ނިންމާލަން ޖެހުނު ނަމަވެސް، ދެވަނަ ހާފު ފެށިގެން އެންމެ 78 ސިކުންތުގެ ތެރޭގައި ޖަމާލް މުސިއާލާ ވަނީ އެ ޓީމަށް ލީޑު ނަގައިދީފައެވެ. އޭގެ ފަހުން އޮލީސޭ ނަގައިދިން ހިލޭ ޖެހުމަކުން ހެރީ ކޭން ބޮލުން ލަނޑު ޖަހައި ލީޑު ފުޅާކުރިއިރު، 77 ވަނަ މިނެޓުގައި އަލްފޮންސޯ ޑޭވީސް ވަނީ އޭރިއާ ބޭރުން ފޮނުވާލި ބާރު ހަމަލާއަކުން ތިންވަނަ ލަނޑު ކާމިޔާބުކޮށްފައެވެ.

Ad by Hajj Corporation

މެޗުގެ ފަހުބައިގައި އޮލީސޭ ވަނީ 25 ޔާޑު ދުރުން މޮޅު ކާވް ހަމަލާއަކުން ހަތަރުވަނަ ލަނޑު ޖަހައި، އިތުރު ވަގުތުގައި އޭނާގެ ދެވަނަ ލަނޑު ކާމިޔާބުކޮށްފައެވެ. ބޯޑޯ/ގްލިމްޓްގެ އޮޑިން ބްޔޯޓުފްޓްއަށް އޮލީސޭއަށް ކުރި ފައުލަކާ ގުޅިގެން ރަތް ކާޑު ދައްކައި ދަނޑުން ފޮނުވާލުމުން އެ ޓީމުން މެޗު ނިންމާލީ އެއް ކުޅުންތެރިއަކު މަދުކޮށެވެ.

މި މެޗުގައި ކާމިޔާބުކުރި ލަނޑާއެކު ހެރީ ކޭން ވަނީ ޗެމްޕިއަންސް ލީގުގައި ވިދިވިދިގެން 8 މެޗުގައި ލަނޑު ޖަހާފައެވެ. ޔޫރަޕްގެ ގަދަ ފަސް ލީގުގެ ކުޅުންތެރިންގެ ތެރެއިން 2026 ވަނަ އަހަރު ލަނޑު ޖެހުމާއި އެސިސްޓް ކުރުމުގައި އެންމެ ކުރީގައި އުޅެނީ 39 ގޯލް ކޮންޓްރިބިއުޝަނާއެކު ކޭން އަދި 34 ގޯލް ކޮންޓްރިބިއުޝަނާއެކު އޮލީސޭއެވެ.