ރާއްޖޭގެ މިސްކިތްތަކުގައި އިމާމުވެ ނަމާދުކުރާ އިމާމުންގެ ފެންވަރު ރަނގަޅުކޮށް އިމާމުން ތާޒާކުރަން އިސްލާމީ ކަންތައްތަކާބެހޭ ވުޒާރާއިން ކުރަމުންދާ މަސައްކަތުގެ ތެރެއިން މިއަހަރު އެކަނިވެސް 738 އިމާމުންނަށް ތަމްރީނު ދީފައިވާކަން، އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ހާމަކުރައްވައިފިއެވެ.

މީސްމީޑިއާގައި ކުރެއްވި ޕޯސްޓެއްގައި ވަޒީރު ވިދާޅުވީ މާލެ ސަރަހައްދުގެ އިމާމުންނަށް އަމާޒުކޮށްގެން ކުރިއަށް ގެންދިޔަ އިމާމުން ތާޒާކުރުމުގެ ޕްރޮގްރާމް، އާދީއްތަ ދުވަހުރޭ ނިންމާލެވިފައިވާ ކަމަށާއި މިއަހަރު މުޅި ޖުމްލަ 738 އިމާމުންނަށް ތަމްރީނުދީފައިވާ ކަމަށެވެ. އަދި އަންނަ އަހަރު މިޞްރުގެ ޖާމިޢަތުލް އަޒްހަރާ ގުޅިގެން އިމާމުން ތަމްރީނުކުރުމަށް މިޞްރަށް ފޮނުވަން ހަމަޖެހިފައިވާކަމަށް ވަޒީރު ވިދާޅުވިއެވެ. މީގެ އިތުރުން އިމާމުންނަށް ޢަރަބި ބަސް ކިޔަވައިދިނުމަށް މޮރޮކޯއަށް ފޮނުވަން ހަމަޖެހިފައިވާ ކަމަށްވެސް ވަޒީރު ވިދާޅުވިއެވެ.

Ad by Hajj Corporation

މިފަދަ ޕްރޮގްރާމް ތަކުގައި މިދިޔަ އަހަރު އިމާމުން ބޭރު ގައުމުތަކަށް ފޮނުވާފައިވާ ތަފާސްހިސާބު ހާމަކުރައްވާ، ވަޒީރު ވިދާޅުވީ ސައުދީ، ބުރޫނާއި، އިންޑޮނޭޝިއާ، މެލޭޝިއާ އިން ޖުމްލަ 100 އަށް ވުރެ ގިނަ ފުރުޞަތުގައި އިމާމުން ތަމްރީނުކުރަން ބޭރަށް ފޮނުވާފައިވާ ކަމަށެވެ.

އިމާމުން ތާޒާކުރުމުގެ ޕްރޮގްރާމަކީ އިމާމުކަމުގެ ދާއިރާއިން އިތުރު ތަމްރީނު ދިނުމަށްޓަކައި 11 ސަރަޙައްދަކަށް ބަހާލައިގެން މުޅި ރާއްޖޭގެ ދާއިމީ އިމާމުންނަށް އަމާޒުކޮށްގެން ކުރިއަށްގެންދާ ޕްރޮގްރާމެކެވެ. މި ޕްރޮގްރާމް ކުރިއަށް ގެންގޮސްފައިވަނީ 9 މާއްދާއެއް ހިމަނައިގެންނެވެ. އެގޮތުން ޤުރްއާނާއި ތަޖުވީދުގެ ޢިލްމާއި ތަފްސީރާއި ފިޤުހާއި ޙަދީޘްގެ އިތުރުން އަޤީދާގެ ޢިލްމުގެ ދާއިރާއިން އިމާމުންނަށް ބޭނުންވާ މުހިއްމު ކަންކަން އުނގަންނައިދެއެވެ.

ރާއްޖޭގައި ގާތްގަނޑަކަށް 700 އެއްހާ ދާއިމީ އިމާމުން އުޅެއެވެ. އިސްލާމީ ކަންތައްތަކާބެހޭ ވުޒާރާގެ އަމާޒަކީ މިއަހަރުގެ ތެރޭގައި ހުރިހާ ދާއިމީ އިމާމުން ތަމްރީންކޮށް ނިންމުމެވެ.