އާދަޔާޚިލާފަށް ބޮޑަށް ބަރުދަން މަތިވެފައިވާ މީހުންނަށް ދާއިމީ ހައްލެއް ހޯދައިދިނުމަށް، އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އާއި ދަރުމަވަންތަ ހޮސްޕިޓަލުގައި ބެރިއަޓްރިކް ސަރޖަރީގެ ޚިދުމަތް ރަސްމީކޮށް ފަށައިފިއެވެ.

މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުއްރައްޒާގް ހަލީމް އެކްސްގައި ކުރެއްވި ޕޯސްޓެއްގައި މިކަން ވަނީ ހާމަކުރަށްވާފައެވެ. ސަރުކާރުގެ ހޮސްޕިޓަލެއްގައި މިފަދަ މުހިންމު ޚިދުމަތެއް ގާއިމުވެގެން ދިއުމަކީ، ބަރުދަން މައްސަލަ ދިމާވެފައިވާ އެތައް ބަޔަކަށް ލިބިގެންދާނެ ވަރަށް ބޮޑު އުއްމީދެކެވެ.

Ad by Hajj Corporation

ބެރިއަޓްރިކް ސަރޖަރީގެ މުހިންމުކަމާއި ފައިދާތައް

ބެރިއަޓްރިކް ސަރޖަރީ އަކީ ހަޖަމްކުރާ ނިޒާމު މަސައްކަތް ކުރާގޮތަށާއި ގޮހޮރުގެ ސައިޒަށް ބަދަލުގެނެސް، އާދަޔާޚިލާފަށް ބޮޑަށް ބަރުދަން މަތިވެފައިވާ މީހުންގެ ބަރުދަން ދާއިމީގޮތެއްގައި ދަށްކުރުމަށް އެހީތެރިވާ ވަރަށް ކާމިޔާބު އޮޕަރޭޝަންތަކެކެވެ. މި އޮޕަރޭޝަންތަކުގެ ސަބަބުން ބަލިމީހާއަށް ރަނގަޅު ސިއްޙަތެއް ލިބި، ނަފްސާނީ ދުޅަހެޔޮކަން ރަނގަޅުވެ، އަމިއްލަ ނަފްސަށް އޮންނަ އިތުބާރު އިތުރުވެގެންދެއެވެ. އަދި އަލުން ބަލިމީހާގެ ހަޔާތަށް އުފާވެރިކަމާއި ހިތްހަމަޖެހުން ގެނުވައިދިނުމަށް އެހީތެރިވެއެވެ.

މީގެ އެންމެ މުހިންމު އެއް ފައިދާއަކީ ބަރުދަން މަތިވުމާ ގުޅިގެން ކުރިން ބޭސްކުރަމުން އައި ގައިންގަޔަށް ނާރާ ބަލިތަކަށް (އެންސީޑީ) ބޭސްކުރަން ނުޖެހުމެވެ. އޭގެ ތެރޭގައި ޓައިޕް 2 ހަކުރުބައްޔާއި، ލޭ މައްޗަށް ދިއުމާއި، ކޮލެސްޓެރޯލް މަތިވުމާއި، ހިތުގެ ބަލިތަކާއި ބައެއް ބާވަތުގެ ކެންސަރުން ރައްކާތެރިވުމަށް އެހީތެރިވުން ހިމެނެއެވެ. ސީއީއޯ އަބްދުއްރައްޒާގް ފާހަގަކުރެއްވި ގޮތުގައި، މި ޚިދުމަތަކީ ބަރުދަން މަތިވުމުގެ ސަބަބުން ދިގު މުއްދަތެއްގައި މިފަދަ ބަލިތަކަށް ފަރުވާ ހޯދަމުން އަންނަ، އުއްމީދު ނެތިފައިވާ އެތައް ބަޔަކަށް ލިބިގެންދާނެ ވަރަށް އުއްމީދީ ހައްލެއް ކަމަށެވެ.

ޚިދުމަތް ފެށުމަށް ކުރި ބުރަ މަސައްކަތް

މި ޚިދުމަތް ފެށުމަށްޓަކައި ސަރޖަރީ ޑިޕާޓްމަންޓުގެ ޓީމުން ވަނީ ދިގު މުއްދަތެއްގައި ބުރަ މަސައްކަތްތަކެއް ކޮށްފައިކަން ސީއީއޯ އަބްދުއްރައްޒާގް ވަނީ ފާހަގަކުރަށްވާފައެވެ. ސީއީއޯ ވިދާޅުވީ، މި ކާމިޔާބީ ހާސިލުވީ ހޮސްޕިޓަލުގެ ސަރޖަނުންނާއި، ހޭނައްތާ ޑޮކްޓަރުން، ނަރުހުން، އެހެނިހެން ޓެކްނިކަލް/ކްލިނިކަލް މަސައްކަތްތެރިންނާއި އިދާރީ މުވައްޒަފުން އަދި ސަޕޯޓް ސްޓާފުންގެ އިޚްލާސްތެރި މަސައްކަތުން ކަމަށެވެ. ޚާއްސަކޮށް، ދިވެހިރާއްޖޭގެ ފުރަތަމަ ބެރިއަޓްރިކް ސަރޖަން، ޑރ. އަޒްނާގެ ނަން ފާހަގަކޮށް ސީއީއޯ ވަނީ މަރުޙަބާ ދަންނަވާފައެވެ.

ސީއީއޯ ރައްޒާގް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ޞިއްޙީ ދާއިރާއަށް ގެންނަވަމުންދާ ހަރުދަނާ އަދި ތަރައްޤީގެ ކުރިއެރުންތަކަކީ ފަހުގެ ތާރީޚެއްގައި މި ދާއިރާއިން ދެކުނު ފާހަގަކޮށްލެވޭ އެންމެ ބޮޑެތި ކާމިޔާބީތަކެއްކަމަށެވެ. މި ޚިދުމަތް ފެށުމަކީ ރާއްޖޭގެ ޞިއްޙީ ދާއިރާގެ ކުރިއެރުމަށް ލިބިގެންދިޔަ މުހިންމު ކުރިއެރުމެއްކަން ފާހަގަކުރެވެއެވެ.