ގޭހާ ގުޅުންހުރި އެކި ވަޞީލަތްތައް ވިއްކުމަށް ފިހާރައެއް ހުޅުމުގެ މަސައްކަތް ކުރަމުން އަންނަ ކަމަށް މޯލްޑިވް ގޭސް ޕްރައިވެޓް ލިމިޓެޑްގެ މެނޭޖިން ޑިރެކްޓަރ ޢަބްދުﷲ މުޙައްމަދު ވިދާޅުވެއްޖެއެވެ.

ޢަބްދުﷲ މުޙައްމަދު މިހެން ވިދާޅުވީ މޯލްޑިވް ގޭސް ކުންފުންޏަށް 25 އަހަރު ފުރުމުގެ މުނާސަބަތުގައި ބޭއްވި ޖަލްސާގައި ވާހަކަދައްކަވަމުންނެވެ.

މޯލްޑިވް ގޭހަށް 25 އަހަރު ފުރުމުގެ މުނާސަބަތުގައި ބޭއްވި ޖަލްސާގައި ވާހަކަދައްކަވަމުން އެ ކުންފުނީގެ މެނޭޖިން ޑިރެކްޓަރ ޢަބްދުﷲ މުޙައްމަދު ވިދާޅުވީ ކުންފުންޏަށް މިވަގުތު ދިމާވެފައިވާ އެންމެ ބޮޑު އެއް ދައްޗަކީ މަސައްކަތްކުރާނެ ޖާގައިގެ ދަތިކަން ކަމަށެވެ. އެހެންކަމުން އަމާޒަކީ ކުރިއަށް އޮތް 2 އަހަރު ދުވަހުގެ ތެރޭގައި 10 ފަންގިފިލާގެ އޮފީސް ޢިމާރާތެއް އެޅުންކަމަށް ޢަބްދުﷲ މުޙައްމަދު ވިދާޅުވިއެވެ.

މޯލްޑިވް ގޭހުގެ މެނޭޖިންގ ޑިރެކްޓަރު ވިދާޅުވީ ޢިމާރާތް އެޅުމުގެ މަސައްކަތުގެ ތެރެއިން މިހާރު ކުރަމުންދަނީ ހުޅުމާލޭގެ ފުރަތަމަ ފިޔަވަހިން ބިން ހަމަޖެއްސުމުގެ މަސައްކަތް ކަމަށެވެ.

މެނޭޖިންގ ޑިރެކްޓަރ ވިދާޅުވީ، އެއަރ ކޮންޑިޝަނަރ، އޭސީ މަރާމަތުކުރުމުގައި ބޭނުންކުރާ ގޭހުގެ ބާވަތް ބަލްކުކޮށް ރާއްޖެ އެތެރެކޮށް، ހެޔޮ އަގުގައި ވިއްކުމުގެ މަގު ފަހިކުރުމަށް މަސައްކަތް ކުރަމުންދާކަމަށެވެ. އަދި ކައްކާ ގޭސް ހުސްނުވެ ލިބޭނެ އިންތިޒާމުވެސް ފުޅާކުރުމުގެ މަސައްކަތްކުރަމުން އަންނަކަމަށްވެސް އެމްޑީ ވިދާޅުވިއެވެ.

މޯލްޑިވް ގޭހަށް 25 އަހަރު ފުރުމުގެ މުނާސަބަތުގައި ބޭއްވި ޖަލްސާގައި ދިދަ ނެގުމުގެ ހަރަކާތެއް ކުރިއަށް ގެންގޮސްފައިވެއެވެ. އަދި ދުވަހުގެ މުނާސަބަތުގައި ކޭކެއް ވަނީ ފަޅާފައެވެ. އަދި އެކުންފުނީގެ ވެބްސައިޓު އަލުން ފަރުމާކޮށް، ލޯންޗުކުރިއެވެ.