އެކި ކުށްތަކުގައި ބަންދުކޮށްފައި ތިބި މީހުންގެ ޝަރީއަތުގެ މަރުހަލާ އަވަސް ކުރުމާ ގުޅޭގޮތުން ކްރިމިނަލް ކޯޓުގެ އިސް ގާޒީ އާދަމް މުހައްމަދާއި ޕްރޮސިކިއުޓަ ޖެނެރަލް (ޕީޖީ) އައްބާސް ޝަރީފް މަޝްވަރާ ކުރައްވައިފި އެވެ.

ކްރިމިނަލް ކޯޓުން މިއަދު "އެކްސް" ގައި ކުރި ޕޯސްޓެއްގައި ބުނެފައިވަނީ އެ ކޯޓުގެ އިސް ގާޒީ، ޕީޖީއާ މިއަދު ބައްދަލުކުރައްވާފައިވާ ކަމަށެވެ. ޕީޖީ އާއެކު ބޭއްވި ބައްދަލުވުމުގައި މައްސަލަތައް ޖަމާވުން މަދުކުރުމަށާއި މިހާރު ބަންދުގައި ތިބި މީހުންގެ ޝަރުއީ މަރުހަލާ އަވަސް ކުރުމާ ގުޅޭގޮތުން މަޝްވަރާ ކުރެވުނު ކަމަށެވެ. މީގެ އިތުރުން ކޯޓުގެ ޖާގައިގެ ދަތިކަމާ ގުޅިގެން ހުރި ކަންބޮޑުވުންތަކުގެ މައްޗަށް ވެސް ވަނީ އަލިއަޅުވާލާފައި ކަމަށެވެ.

ޝަރީއަތް ނިމެންދެން ބަންދުގައި ތިބެން ޖެހޭ ޖެހުމަށް ހައްލު ހޯދުމަށް ގެންގުޅުއްވާ ތަސައްވަރާ ގުޅޭގޮތުން އައްބާސް މީގެކުރިން ވިދާޅުވެފައިވާ ގޮތުގައި މައްސަލައިގެ ތަހުގީގު ފެށޭ ހިސާބުން ޝަރީއަތް ނިމެންދެން ބަންދުކުރަން ޖެހޭ އުސޫލަކީ ގާނޫނު އަސާސީގެ ދަށުން ބަޔާންކޮށްފައި އޮންނަ އުސޫލެއް ކަމުގަ އެވެ. އެކަމަށް ހައްލު ގެނައުމަކީ ގާނޫނު އަސާސީއަށް ވެސް ބަދަލު ގެންނަން ޖެހިދާނެ ކަމެއްކަން ފާހަގަކުރެއްވި އެވެ.

މުޅި މައްސަލައަށް ހައްލު ހޯދޭނީ ވަށާ ޖެހޭ ދިރާސާއެއްގެ ތެރެއިން އަސްލު މައްސަލަ ދެނެގަނެ، ހުރިހާ ފަރާތްތަކެއް އެއްކޮށް މަސައްކަތް ކޮށްގެން ކަމަށެވެ. އަދި މައްސަލަތައް ގާނޫނުތަކުގައި ކަނޑައެޅިފައިވާ މުއްދަތުތަކާ އެއްގޮތަށް ވީހާވެސް އަވަހަށް ނިމިގެން ދިއުން މުހިންމުކަން ވެސް އައްބާސް ފާހަގަކުރައްވާފައިވެ އެވެ.