ފިހާރައެއްގެ ކައުންޓަރު މަތީގައި އޮތް ފޯނެއް ވަގަށް ނެގި މީހަކު 9 މަހަށް ޖަލަށްލުމަށް ކްރިމިނަލް ކޯޓުން ހުކުމްކޮށްފި އެވެ

އެ މައްސަލާގައި އިއްޔެ ކްރިމިނަލް ކޯޓުން ހުކުމްކޮށްފައިވަނީ ކަނދުމާގެއާގެ, ކ.މާލެ, ސަމާހް އަލީގެ މައްޗަށެވެ.

ޖޫން 2022, 7 އިރުއޮއްސި 6:20 ހާއިރު އަމީނީމަގުގައި ޕެޓްރޯލް ކުރަމުންދިޔަ ފުލުހުންނަށް ސަމާހް ފެނުނީ ރެހެންދި ފްލެޓް ކައިރިންނެވެ. އެވަގުތު ސަމާހް ބިރުގަނެ, ފިލަން މަސައްކަތްކުރުމުން ގާނޫނާ ހިލާފު އަމަލެއް ކޮށްގެން އުޅޭކަމަށް ފުލުހުންނަށް ތުހުމަތުކުރެވިގެން ހަށިގަނޑު ބަލާ ފާސްކުރިއިރު ގާކޮށި މާޓްގެ ސެމްސަން ބްރޭންޑްގެ އެސް10 ފޯނު އޭނާގެ އަތުން ފެނިފައިވާތީ އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާ އުފުލި އެވެ.

އެހެންނަމަވެސް އެފަދަ އެއްވެސް ކަމެއް ކޮށްފައިނުވާނެ ކަމަށް ބުނެ ސަމާހް ދައުވާއަށް އިންކާރުކުރި އެވެ.

މި މައްސަލައިގައި ހެކިބަސް ދެމުން ފުލުހުންގެ އޮފިސަރު ބުނީ ސަމާހްގެ އަތުން ފެނުނު ފޯނަށް މީހަކު ގުޅާތީ ފުލުހުންގެ އެދުމުގެ މަތިން އެ ކޯލު ނަގާ ސްޕީކަރަށްލީއިރު އެއީ ފިހާރައަށް ގުޅި ކަސްޓަމަރެއް ކަމަށެވެ. އަދި އެ ފިހާރައަކީ ގާކޮށި ފްލެޓްގައި އިންނަ ފިހާރައެއް ކަން އެނގުމުން ސަމާހް ގޮވައިގެން އެ ފިހާރައަށް ދިޔައިރު އެ ފޯނު ގެއްލިގެން އުޅޭ ކަމަށް ފުލުހުންގެ އޮފިސަރު ބުނެފައިވެ އެވެ.

ހުކުމުގައި ބުނެފައިވަނީ އެ ފޯނަކީ 7000 ރުފިޔާގެ ފޯނެއްކަން އިންވޮއިސްއިން އެނގޭ ކަމަށެވެ

އެ މައްސަލާގެ ބަންދުގައި 16 ދުވަސް ހޭދަކޮށްފައިވާތީ ސަމާހް ތަންފީޒުކުރަން ޖެހޭ އަދަބަކީ 9 މަހާއި 2 ދުވަސް ކަމަށް ކޯޓު އަމުރުން އެނގެ އެވެ.