މާރާމާރީއެއްގެ ތުހުމަތުގައި ހައްޔަރު ކުރި އައްޑޫ ސިޓީއަށް ނިސްބަތްވާ މީހަކު، ފުލުހުންގެ ބެލުމުގެ ދަށުގައި ހުއްޓާ ޖަލުތެރެއަށް ވެއްޓި، ހޮސްޕިޓަލުގައި ފަރުވާ ދޭން ފަށައިފިއެވެ.

އައްޑޫ ސިޓީގެ ހިތަދޫ އަށް ނިސްބަތްވާ އުމުރުން 43 އަހަރުގެ އެ މީހާ އާ ގުޅޭ ކްރިމިނަލް ކޯޓުގެ ބަންދު އަމުރުގައި ބުނެފައިވަނީ، އޭނާގެ ބަންދާމެދު ގޮތެއް ނިންމުމުގެ މަޖިލިސް ކުރިއަށް ގެންގޮސްފައިވަނީ ޝަރީއަތް ކުރުމާބެހޭ ޖިނާއީ އިޖުރާއަތު ގަވާއިދުގެ ފަސް ވަނަ މާއްދާއަށް ރިއާޔަތްކޮށް ކަމަށެވެ. އޭނާގެ ބަންދަށް ކޯޓުން ވަނީ ފަސް ދުވަސް ޖަހައިފައެވެ.

Ad by Hajj Corporation

އަދި އޭނާ ފުލުހުންގެ ކަސްޓޯޑިއަލްގައި ހުއްޓާ ވެއްޓި އޭނާގެ ހަރަކާތްތައް ދަށްވުމުން ވަގުތުން ސިއްހީ ފަރުވާދިނުމަށް ހޮސްޕިޓަލަށް ގެންދެވިފައިވާކަމަށް އައިއޯ (އިންވެސްޓިގޭޓިން އޮފިސަރު) ބުނެފައިވާ ކަމަށްވެސް އަމުރުގައި ވެއެވެ.

އަދި އޭނާއަށް ހޮސްޕިޓަލުގައި ފަރުވާދެމުންދާކަން އެނގޭނޭ ލިޔުން ހުށަހަޅުއްވާފައިވާ ކަމަށްވެސް ބުނެފައި ވެއެވެ.

އެ އަމުރުގައި ބުނެފައިވަނީ އޭނާ ހޮސްޕިޓަލުން ދޫކޮށްލުމާއެކު، 24 ގަޑިއިރުގެ ތެރޭގައި ފަނޑިޔާރެއްގެ ކުރި މައްޗަށް ހާޒިރުކުރަންވާނެ ކަމަށެވެ.