އަންނަ ޖެނުއަރީ މަހުން ފެށިގެން ސިޔާސީ ޕާޓީތަކުން ވަގުތުން ވަކިވެވޭ ގޮތަށް ބަދަލު ގެނައުމަށް ނިންމާފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.
ސިޔާސީ ޕާޓީއަކުން ވަކިވުމަށް އެދޭނަމަ މިހާރު ހުށަހަޅަންޖެހެނީ ކޮމިޝަނުގެ ޕޯޓަލް މެދުވެރިކޮށެވެ. އެގޮތަށް ހުށަހެޅުމުން 14 ދުވަހުގެ ތެރޭގައި ވަކިކޮށްދެއެވެ.
މެންދުރަށް މައުލޫމާތުދެމުން ކޮމިޝަނުގެ ނައިބު ރައީސް ޢަބްދުއްރަޙްމާން ސަލާހު ރަޝީދު ވިދާޅުވީ އަންނަ ޖެނުއަރީމަހުން ފެށިގެން ޕާޓީތަކުން ވަގުތުން ވަކިވެވޭ ގޮތަށް ބަދަލު ގެނައުމަށް ނިންމާފައިވާކަމަށެވެ.

ސިޔާސީ ޕާޓީތަކުގެ އިސް މަގާމުތަކުގައި ތިއްބަވާ ބޭފުޅުންގެ ތެރެއިން ޕާޓީގެ ޗެއަރޕާސަނާއި، ރައީސާއި، ހަޒާންދާރާއި، ރަޖިސްޓްރާ ފަދަ މަގާމުތަކަކީ ރެކޯޑުގައި ހިމެނޭ ބަޔަކަށްވާތީ އެފަދަ ފަރާތްތަކުން ޕާޓީން ވަކިވާން އެދޭ ހާލަތުގައި ވަގުތު ނަގާނެ ކަމަށް ސަލާހު ވިދާޅުވިއެވެ.

Ad by Hajj Corporation

ޤާނޫނަށް މިފަހުން ގެނައި އިސްލާހުގެ ދަށުން މަޖިލިސް މެންބަރުންނާއި ކައުންސިލަރުން އިންތިހާބުވާ ސިޔާސީ ޕާޓީން ވަކިވެއްޖެނަމަ ނުވަތަ ޕާޓީ ބަދަލުކޮށްފިނަމަ އެ މެންބަރެއްގެ ގޮނޑި ގެއްލެއެވެ.