ކަންނެލި މަސް ޕްރޮސެސްކޮށް، ބަންދުކުރުމުގެ މަސައްކަތް ކުރުމަށް ފެސިލިޓީއެއް އެޅުމަށް ހުއްދަލިބިފައިވާ ކަމަށާއި އަންނަ ޖަނަވަރީ މަހުގެ ތެރޭ އެ މަސައްކަތް ފަށައިގަނެވޭނެ ކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު، އަޙްމަދު ޝިޔާމް ވިދާޅުވެއްޖެއެވެ.

ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުން، މަސްވެރި ސިނާއަތުގައި ހުރި މައްސަލަތައް ހައްލު ކުރުމަށް މި ސަރުކާރުން ގިނަ މަސައްކަތްތަކެއް ކުރައްވަމުން ގެންދަވާކަން ފާހަގަކުރައްވާ، ވަޒީރު ވަނީ އޭގެތެރޭގައި ބޮޑު ކަންނެލި މަސްވެރިންގެ ހުރި ކަންބޮޑުވުމަށް ހައްލު ގެނެސްދެއްވުމަށް މަސައްކަތް ކުރައްވާކަން ފާހަގަކުރައްވާފައެވެ.

Ad by Hajj Corporation

އެގޮތުން ވަޒީރު ފާހަގަކުރެއްވި ކަންތައްތަކުގެ ތެރޭގައި، ބޮޑު ކަންނެލީގެ މަސްވެރިން މާލެ ސަރަހައްދުގައި ހަރަކާތްތެރިވާއިރު، އަގުހެޔޮކޮށް ތެޔޮ ލިބޭނެ މަގު ފަހިވުމަށް ބޭނުންވެފައިވި ވުމަށް ހައްލެއް ހޯއްދަވައިދެއްވާ، މިދިޔަ އަހަރުތެރޭ އެސްޓީއޯ މެދުވެރިކޮށް ރައީސް ހަމަޖައްސައިދެއްވާފައިވާކަން ފާހަގަކުރެއްވިއެވެ. އަދި މިކަމުގެ ސަބަބުން ބޮޑު ކަންނެލި މަސްވެރިންނަށް ބޮޑެތި ލުއިތަކެއް ލިބިގެންދިޔަކަން ވަޒީރު ފާހަގަކުރެއްވިއެވެ.

މީގެ އިތުރުން، ކަންނެލި މަސް ޕްރޮސެސްކޮށް، ބަންދުކުރާ ފެސިލިޓީއެއް އެޅުމަކީ ރައީސްގެ ވައުދުފުޅުގައި ހިމެނޭކަމެއްކަން ފާހަގަކުރެއްވާ، އެކަން ފުއްދުމުގެ މަސައްކަތް މިހާރު ކުރިއަށްދާކަމަށް ވަޒީރު ވިދާޅުވިއެވެ. އަދި މި މަސައްކަތަށް ހުޅުމާލެއިން 25،000 އަކަފޫޓުގެ ބިމެއް ކަނޑައަޅާފައިވާކަމަށް ވަޒީރު ވިދާޅުވިއެވެ.

ކަންނެލި މަސް ޕްރޮސެސްކޮށް، ބަންދުކުރުމުގެ މަސައްކަތަށް މިފްކޯގެ ފެސިލިޓީ ތަރައްގީކުރަނީ އިސްލާމިކް ޑިވެލޮޕްމަންޓް ބޭންކު، (އައިއެސްޑީބީ) ގެ ލޯނު އެހީއެއްގެ ދަށުންނެވެ.