އިސްރާއީލުން ހިންގާފައިވާ ހަނގުރާމައިގެ ޖަރީމާތަކުގެ ތަހުގީގު ހުއްޓުވުމަށް އިސްރާއީލުން ހުށަހެޅުމުން އިންޓަރނޭޝަނަލް ކްރިމިނަލް ކޯޓް - އައިސީސީން އެކަމަށް ދެކޮޅުހަދައިފިއެވެ.

އިންޓަރނޭޝަނަލް ކްރިމިނަލް ކޯޓްގެ އިސްތިއުނާފް ޗެމްބަރަށް، އިސްރާއީލުން ވަނީ، އިސްރާއީލުން ޣައްޒާގައި ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ހަނގުރާމައިގެ ޖަރީމާތަކުގެ ތަހުގީގަށް ހުރަސް އެޅުމަށް ހުށެހެޅުމަށް ހުށަހަޅާފައެވެ. ނަމަވެސް، ޗެމްބަރުން ވަނީ އެ ހުށަހެޅުން ބަލައިނުގަނެ ބޭރުކޮށްލާފައެވެ.

Ad by Hajj Corporation

2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހު ހަމާސް ޖަމާއަތުން އިސްރާއީލުގެ ދެކުނަށް ދިން ހަމަލާއާ ގުޅިގެން އިސްރާއީލުން ޣައްޒާއަށް ދެމުންގެންދާ ލާއިންސާނީ ހަމަލާތަކާއި ހިންގަމުންދާ ހަނގުރާމައިގެ ޖަރީމާތައް ތަހުގީގު ކުރުމުގެ ބާރު އައިސީސީގެ ޕްރޮސެކިއުޓަރަށް ދިނުމަށް ދަށު ކޯޓުން ނިންމި ނިންމުން ބާތިލުކުރަން ފަނޑިޔާރުން ވަނީ ދެކޮޅު ހަދާފައެވެ.

މި ނިންމުމުގެ ސަބަބުން ފަލަސްތީނުގެ މައްސަލައިގައި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި ކުރީގެ ޑިފެންސް މިނިސްޓަރު ޔޯވް ގެލަންޓް ހައްޔަރުކުރުމަށް މިދިޔަ އަހަރުގެ ނޮވެމްބަރު މަހު ނެރުނު އަމުރު ތަންފީޒުކުރުން ކުރިއަށްދާނެއެވެ. އަދި ހަނގުރާމައިގެ ޖަރީމާތަކުގެ ތަހުގީގު ކުރިއަށްދާނެއެވެ.

އިސްރާއީލުން ވަނީ ކޯޓުގެ އިޚްތިޞާޞް ބަލައިނުގަނެ، ޣައްޒާގައި ހަނގުރާމައިގެ ޖަރީމާތައް ހިންގާފައިވާ ކަމަށް ތަކުރާރުކޮށް އިންކާރުކޮށްފައެވެ.

ހަމާސްގެ ލީޑަރު އިބްރާހިމް އަލް މަސްރީ ހައްޔަރު ކުރުމުގެ އަމުރެއް ވެސް އައިސީސީން ނެރެފައިވީ ނަމަވެސް، އޭނާ ޝަހީދުވި ކަމުގެ ޚަބަރު ލިބުމާ ގުޅިގެން އެ އަމުރު ވަނީ އަނބުރާ ގެންގޮސްފައެވެ.