އީ.އެފް.އެލް ކަޕްގެ ކުއާޓާ ފައިނަލުގައި ކްރިސްޓަލް ޕެލަސްއާ ބައްދަލުކުރި މެޗު ޕެނަލްޓީ ޖަހައިގެން ކާމިޔާބުކޮށް، އާސެނަލް މުބާރާތުގެ ސެމީ ފައިނަލުން ޖާގަ ހޯދައިފިއެވެ. މެޗުގެ ފުރިހަމަ ވަގުތު ހަމަވިއިރު 1-1 އިން ދެޓީމު އެއްވަރުވެފައި އޮތުމުން ނަތީޖާ ނެރުނީ ޕެނަލްޓީ ޝޫޓްއައުޓްގައެވެ.

މެޗުގެ 80 ވަނަ މިނެޓުގައި ޕެލަސްގެ މެކްސެންސް ލަކްރޮއާ އަތުން ބައިކޮޅަށް ވަން ލަނޑަކުން އާސެނަލް މޮޅުވާން ދަނިކޮށް، މެޗުގެ އިތުރު ވަގުތުގައި ޕެލަސްގެ މާކް ގުއޭހީ ވަނީ ލަނޑެއް ޖަހައި މެޗުގެ ނަތީޖާ އެއްވަރުކޮށްފައެވެ. ނަމަވެސް ޕެނަލްޓީ ޝޫޓްއައުޓްގައި ލަކްރޮއާ ފޮނުވާލި ޕެނަލްޓީ އާސެނަލްގެ ކީޕަރު ކެޕާ އަރިޒަބަލާގާ ދިފާއުކުރުމާއެކު އާސެނަލްއަށް ކުރި ލިބުނެވެ.

Ad by Hajj Corporation

މެޗުގެ ފުރަތަމަ ހާފުގައި އާސެނަލްއިން ވަނީ ވަރަށް ވަރުގަދަ ކުޅުމެއް ދައްކާފައެވެ. ނަމަވެސް ޕެލަސްގެ ބަދަލު ކީޕަރު ވޯލްޓާ ބެނިޓޭޒް ވަނީ ނޯނީ މަޑުއެކޭ އާއި ގެބްރިއަލް ޖީސޫސް ފޮނުވާލި ނުރައްކާތެރި ހަމަލާތަކެއް ހުށިޔާރުކަމާއެކު ދިފާއުކޮށްފައެވެ. ދެވަނަ ހާފުގައި ޕެލަސްއިން ކުޅުން ރަނގަޅުކޮށް އާސެނަލްގެ ގޯލަށް ނުރައްކާ ކުރި ނަމަވެސް، އާސެނަލްއިން ލީޑު ނެގީ ޖޫރިއަން ޓިމްބާ ފޮނުވާލި ބޯޅައެއް ލަކްރޮއާގެ ގައިގައި ޖެހިފައި ގޯލަށް ވަނުމުންނެވެ.

ޕެނަލްޓީ ޝޫޓްއައުޓްގައި ދެޓީމުން ޖެހި ފުރަތަމަ 14 ޕެނަލްޓީވެސް ވަނީ ކާމިޔާބުކޮށްފައެވެ. ނަމަވެސް ޕެލަސްގެ ލަކްރޮއާ ފޮނުވާލި ޕެނަލްޓީ ކެޕާ ދިފާއުކުރުމުން އާސެނަލްއަށް ސެމީގެ ޖާގައެއް ލިބިގެން ދިޔައެވެ.

ފަސް އަހަރުގެ ތަށީގެ ހުސްކަމަކަށް ނިމުން ގެނައުމަށް އަމާޒު ހިފާފައިވާ މިކޭލް އާޓެޓާގެ އާސެނަލް ސެމީ ފައިނަލުގައި ބައްދަލުކުރަން ޖެހޭނީ ޗެލްސީއާއެވެ. މި ކުރިމަތިލުމުން މޮޅުވާ ބަޔަކު ފައިނަލުގައި ބައްދަލުކުރަން ޖެހޭނީ މެންޗެސްޓާ ސިޓީ ނުވަތަ އެންމެ ފަހުގެ ޗެމްޕިއަން ނިއުކާސަލް ޔުނައިޓެޑާއެވެ.