އިނގިރޭސި ޕްރިމިއާ ލީގުގައި ރޭ ބްރައިޓަންއާ ދެކޮޅަށް ކުޅުނު އުނދަގޫ މެޗުން މޮޅުވެ، އާސެނަލް އިން ތާވަލުގެ އެއްވަނައިގައި ހަތް ޕޮއިންޓުގެ ލީޑެއް ނަގައިފިއެވެ. މިއީ ދެވަނައިގައި އޮތް މެންޗެސްޓާ ސިޓީ، އަމިއްލަ ދަނޑުގައި ނޮޓިންހަމް ފޮރެސްޓާ ވާދަކޮށް 2-2 އިން އެއްވަރުވުމާ ގުޅިގެން އާސެނަލްއަށް ލިބުނު ބޮޑު ކުރިއެރުމެކެވެ.

މެޗުގެ ބޮޑު ބައެއްގައި ބްރައިޓަން އިން މޮޅަށް ކުޅެ އާސެނަލްއަށް ނުފޫޒު ފޯރުވި ނަމަވެސް، މެޗުގެ ކުރީކޮޅު ބުކާޔޯ ސަކާ ފޮނުވާލި ހަމަލާއަކުން އާސެނަލް ވަނީ ކުރިހޯދާފައެވެ. ސަކާ ފޮނުވާލި މި ބޯޅަ ބްރައިޓަންގެ ކުޅުންތެރިއެއްގެ ގައިގައި ޖެހި މިސްރާބު ބަދަލުވެގެން ގޯލަށް ވަނީ ބްރައިޓަންގެ ކީޕަރު ބާޓް ވާބްރޫގެންގެ ފައިދަށުންލާފައެވެ.

Ad by Hajj Corporation

މެޗުގެ ފެށުން އާސެނަލްއަށް ވަރަށް ނުރައްކާތެރިވިއެވެ. ކީޕަރު ޑޭވިޑް ރާޔާ ފޮނުވާލި ބޯޅައެއް ބްރައިޓަންގެ ކާލޯސް ބަލެބާއަށް ލިބި، އޭނާ ފޮނުވާލި ބޯޅަ އާސެނަލްގެ ޑިފެންޑަރު ގަބްރިއަލް ވަނީ ގޯލު ރޮނގުމަތިން ސަލާމަތްކޮށްފައެވެ. މިއީ އާސެނަލްގެ ނަސީބު ރަނގަޅުކަމުން ސަލާމަތްވި ފުރުސަތެކެވެ.

މެޗުގެ ފަހުބައިގައި ބްރައިޓަންގެ ސަޕޯޓަރުންނާއި ކޯޗު ފަބިއަން ހާޒެލާ ވަނީ އާސެނަލް އިން ވަގުތު ބޭކާރުކުރާ ކަމަށް ބުނެ ވަރަށް ބޮޑަށް ހިތްހަމަނުޖެހުން ފާޅުކޮށްފައެވެ. ހާއްސަކޮށް، ރާޔާ ބްރައިޓަންގެ ހަމަލާއެއް ދިފާއުކުރުމަށްފަހު ކޮނޑުގައި ރިއްސާތީ ދަނޑުމަތީގައި ފަރުވާ ހޯދަން މަޑުކުރުމުން މަސްރަހު ވަރަށް ބޮޑަށް ހޫނުވިއެވެ.

ބްރައިޓަންއަށް ނަތީޖާ އެއްވަރުކުރަން ރަނގަޅު ފުރުސަތުތަކެއް ލިބުނެވެ. އެގޮތުން މެޓްސް ވީފާ މުޅިން ހުސްކޮށް ހުރެ ބޮލުން ފޮނުވާލި ބޯޅަ ސީދާ ކީޕަރު ރާޔާގެ އަތަށް ދިޔުމަކީ އެ ޓީމަށް ލިބުނު ބޮޑު މާޔޫސްކަމެކެވެ. ނަމަވެސް މެޗުގެ ފަހުކޮޅު ބްރައިޓަންގެ ކުޅުންތެރިން ވަރުބަލިވުމުގެ ފައިދާ ނަގައި، އާސެނަލް އިން ވަނީ ނަތީޖާ ހިފަހައްޓާފައެވެ.

މި މޮޅާއެކު މިކޭލް އާޓެޓާގެ ޓީމުން ވަނީ ލީގު ތަށީގެ ރޭހުގައި ވަރުގަދަ ފިޔަވަޅެއް އަޅާފައެވެ. ސިޓީއަށް ޕޮއިންޓް ގެއްލުނު ރެއެއްގައި ލިބުނު މި ތިން ޕޮއިންޓަކީ އާސެނަލްއަށް ނުހަނު އަގުހުރި މޮޅެކެވެ.