ޕްރީމިއަރ ލީގުގެ އެއްވަނައިގައި އޮތް އާސެނަލުން ތާވަލުގެ ރެލިގޭޝަން ޒޯނުގައި އޮތް އެންމެ ނިކަމެތި ޓީމުކަމަށްވާ ވުލްވްސް އަށް ފަހުގަޑީގައި ޕޮއިންޓް އެއް ދީދީފިއެވެ.

ޕްރިމިއާ ލީގުގެ އެއްވަނައިގައި އޮތް އާސެނަލްއާ ދެކޮޅަށް ކުޅުނު މެޗުގެ ފަހު ވަގުތު ޓޮމް އެޑޯޒީ ޖެހި ލަނޑާއެކު، ވުލްވްސްއިން 2-2 އިން އެއްވަރުކޮށް އާސެނަލްގެ ތަށި ހޯދުމުގެ އުންމީދުތަކަށް ހުރަސް އަޅައިފިއެވެ. މޮލިނިއު ސްޓޭޑިއަމްގައި ކުޅުނު މި މެޗުގައި އާސެނަލްއިން ދެ ލަނޑުގެ ލީޑެއް ނަގާފައި ވަނިކޮށް، ވުލްވްސްއިން ވަނީ ފަހަތުން އަރައި ނަތީޖާ އެއްވަރުކޮށްފައެވެ.

Ad by Hajj Corporation

މެޗުގެ ފަސްވަނަ މިނެޓުގައި އާސެނަލްއަށް ކުރިހޯދައިދިނީ ކެޕްޓަން ބޭންޑް އަޅައިގެން ކުޅުނު ބުކާޔޯ ސަކާއެވެ. ޑެކްލަން ރައިސް ނަގައިދިން ހުރަހަކުން ސަކާ މި ލަނޑު ކާމިޔާބުކުރިއިރު، މިއީ އޭނާ އާސެނަލްއާއެކު އާ އެއްބަސްވުމެއްގައި ސޮއިކުރި ކަމުގެ ޚަބަރުތައް ފެތުރިފައިވާ ދަނޑިވަޅެއްގައި ޖެހި މުހިންމު ލަނޑެކެވެ. މެޗުގެ 56 ވަނަ މިނެޓުގައި ޕިއޭރޯ ހިންކާޕީ ވަނީ އާސެނަލްގެ ދެވަނަ ލަނޑު ޖަހައިދީފައެވެ. ވީއޭއާރުން ބެލުމަށްފަހު ގަބޫލުކުރި މި ލަނޑާއެކު އާސެނަލްއަށް ތިން ޕޮއިންޓް ކަށަވަރުވީ ކަމަށް ބެލެވުނެވެ.

ނަމަވެސް، އޭގެ ފަސް މިނެޓު ފަހުން ވުލްވްސްގެ ހޫގޯ ބުއޭނޯ ވަނީ ހިތްގައިމު ލަނޑެއް ޖަހައި ފަރަގު ކުޑަކޮށްފައެވެ. މެޗުގެ ފުރިހަމަ ވަގުތު ހަމަވެ، އިތުރުވަގުތުގެ ގޮތުގައި ދެއްކި 94 ވަނަ މިނެޓުގައި ވުލްވްސް ސަލާމަތްކޮށްދިނީ އަލަށް ސީނިއާ ޓީމަށް ކުޅުނު އެޑޯޒީއެވެ. އާސެނަލްގެ ގޯލްކީޕަރު ޑޭވިޑް ރާޔާ އަތުން ބޭރުވި ބޯޅައެއް އެޑޯޒީ ފޮނުވާލުމުން، އެ ބޯޅަ ގޯލަށް ވަނީ ރިކާޑޯ ކަލަފިއޯރީގެ ގައިގައި ޖެހިފައެވެ.

މި ނަތީޖާއާއެކު އާސެނަލްއަށް ތާވަލުގެ ކުރީގައި ލިބިފައިވާ ލީޑު ވަނީ ފަސް ޕޮއިންޓަށް ކުޑަވެފައެވެ. ދެވަނައިގައި އޮތް މެންޗެސްޓާ ސިޓީއަށް ހޮނިހިރު ދުވަހު ނިއުކާސަލް ޔުނައިޓެޑް ބަލިކޮށްގެން އާސެނަލްއާ ދެ ޕޮއިންޓަށް ގާތްވުމުގެ ފުރުސަތު އެބައޮތެވެ. ތަފާސްހިސާބުތަކަށް ބަލާއިރު، މިއީ 2019 ވަނަ އަހަރުގެ ފަހުން ދެ ލަނޑުން ފަހަތުގައި އޮވެ ވުލްވްސްއިން އަމިއްލަ ދަނޑުގައި ބަލިނުވެ ސަލާމަތްވި ފުރަތަމަ ފަހަރެވެ.

އާސެނަލްއަށް މި ސީޒަނުގައި ކުރިމަތިވަމުންދާ އެންމެ ބޮޑު ގޮންޖެހުމަކީ ލީޑުގައި އޮވެ ޕޮއިންޓް ގެއްލުމެވެ. 2026 ވަނަ އަހަރުގެ މިހާތަނަށް އާސެނަލްއިން ވަނީ ލީޑުގައި އޮވެ ހަތް ޕޮއިންޓް ގެއްލުވާލާފައެވެ. މި މެޗުގައި އާސެނަލްއިން ގިނަ ވަގުތު ބޯޅަ ހިފަހައްޓައި ގިނަ ފުރުސަތުތަކެއް ތަނަވަސްކުރި ނަމަވެސް، މެޗުގެ ފަހު ވަގުތު ވުލްވްސްއިން ދެއްކި ހިތްވަރާއެކު އާސެނަލްއަށް ޖެހުނީ އެއް ޕޮއިންޓުން ފުއްދާލާށެވެ.