އިނގިރޭސި ޕްރިމިއާ ލީގުގައި ރޭ ކުޅުނު މެޗުގައި ސަންޑަލޭންޑް އަތުން 3-0 އިން މޮޅުވެ، ތާވަލުގެ އެއްވަނައިގައި އާސެނަލުން ނުވަ ޕޮއިންޓުގެ ލީޑެއް ނަގައިފިއެވެ. މި މޮޅާއެކު އާސެނަލަށް މިވަނީ ލީގު ތާވަލުގެ ކުރީގައި ބޮޑު ލީޑެއްހޯދައި ލީގު ކާމިޔާޞު ކުރުމާއި ގާތަށް ޖެހިލާފައެވެ.

މެންޗެސްޓާ ސިޓީ އާދީއްތަ ދުވަހާ ހަމައަށް މެޗެއް ކުޅެން ނެތުމާއި، އެސްޓަން ވިލާ އާއި ބޯންމައުތު ބައްދަލުކުރި މެޗު އެއްވަރުވުމުގެ ފައިދާ އާސެނަލުން ވަނީ ވަރަށް ރަނގަޅަށް ހިފާފައެވެ. މެޗުގެ ފުރަތަމަ ހާފުގައި އާސެނަލުން ގިނަ ފުރުސަތުތަކެއް ތަނަވަސްކުރިއިރު، މެޗުގެ ލީޑު އެޓީމުން ނެގީ ފުރަތަމަ ހާފު ނިމެން ތިން މިނެޓަށް ވެފައި ވަނިކޮށެވެ. ލިއަންޑްރޯ ޓްރޮސާޑް ތަނަވަސްކޮށްދިން ފުރުސަތަކުން މި ލަނޑު ކާމިޔާބުކޮށްދިނީ މާޓިން ޒުބިމެންޑީއެވެ.

Ad by Hajj Corporation

އާސެނަލްގެ ދެވަނަ ލަނޑާއި ތިންވަނަ ލަނޑު ފެނިގެންދިޔައީ މެޗުގެ ދެވަނަ ހާފުގައެވެ. ބަދަލު ކުޅުންތެރިއެއްގެ ގޮތުގައި ކުޅެން އެރިތާ ހަ މިނެޓު ތެރޭގައި ވިކްޓަރ ގިޔޮކެރޭސް ވަނީ އާސެނަލްގެ ދެވަނަ ލަނޑު ޖަހައިދީފައެވެ. އަދި މެޗުގެ އިތުރު ވަގުތުގެ ތެރޭގައި ގަބްރިއަލް މާޓިނެލީ ތަނަވަސްކޮށްދިން ފުރުސަތަކުން ގިޔޮކެރޭސް ވަނީ އޭނާގެ ދެވަނަ ލަނޑު ކާމިޔާބުކޮށް މެޗުގެ ނަތީޖާ 3-0 އަށް ބަދަލުކޮށްލާފައެވެ.

މިއީ 2003-04 ވަނަ އަހަރުގެ ސީޒަނަށްފަހު، ލީގު ތާވަލުގެ ކުރީގައި އާސެނަލުން ނުވަ ޕޮއިންޓުގެ ލީޑެއް ނެގި ފުރަތަމަ ފަހަރެވެ. އެ ސީޒަނަކީ އެއްވެސް މެޗަކުން ބަލިނުވެ އާސެނަލުން ލީގު ޗެމްޕިއަންކަން ހޯދި ތާރީޚީ ސީޒަނެވެ.