އިނގިރޭސި ޕްރިމިއާ ލީގުގައި ރޭ ކުޅުނު ފޯރިގަދަ މެޗުގައި މެންޗެސްޓާ ޔުނައިޓެޑުން 3-2 ގެ ނަތީޖާއަކުން އާސެނަލް ބަލިކޮށްފިއެވެ. އެމިރޭޓްސް ސްޓޭޑިއަމްގައި ކުޅުނު މި މެޗުން ބަލިވުމާއެކު، ތާވަލުގެ އެއްވަނައިގައި އާސެނަލުން ދަމަހައްޓަމުން އައި ހަތް ޕޮއިންޓުގެ ލީޑު ވަނީ ހަތަރު ޕޮއިންޓަށް ކުޑަވެފައެވެ.

މެޗުގެ 29 ވަނަ މިނެޓުގައި އާސެނަލުން ވަނީ ކުރި ހޯދާފައެވެ. މިއީ މާޓިން އޮޑެގާޑް ފޮނުވާލި ހަމަލާއެއް ދިފާއުކުރަން އުޅުމުގެ ތެރޭގައި ޔުނައިޓެޑުގެ ލިސަންދްރޯ މާޓިނޭޒް އަތުން ބައިކޮޅަށް ވަން ލަނޑެކެވެ. ނަމަވެސް 37 ވަނަ މިނެޓުގައި އާސެނަލްގެ މާޓިން ޒުބިމެންޑީއަށް ހެދުނު ގޯހެއްގެ ފައިދާ ނަގައި ބްރަޔަން އެމްބިއުމޯ ވަނީ ޔުނައިޓެޑަށް ނަތީޖާ ހަމަހަމަކޮށްދީފައެވެ. މިއީ އޭނާ ޕްރިމިއާ ލީގުގައި ކާމިޔާބުކުރި 50 ވަނަ ލަނޑެވެ.

Ad by Hajj Corporation

ދެވަނަ ހާފު ފެށިގެން ފަސްވަނަ މިނެޓުގައި ޕެޓްރިކް ޑޯގޫ ވަނީ ހިތްގައިމު ގޯލެއް ޖަހައި ޔުނައިޓެޑަށް ފުރަތަމަ ފަހަރަށް ކުރި ހޯދައިދީފައެވެ. އާސެނަލުން މެޗުގެ ނަތީޖާ ހަމަހަމަކުރީ ބަދަލު ކުޅުންތެރިއެއްގެ ގޮތުގައި ކުޅެން އެރި މިކޭލް މެރީނޯ ޖަހައިދިން ލަނޑުންނެވެ. ނަމަވެސް މެޗުގެ 87 ވަނަ މިނެޓުގައި މަތިއަސް ކޫންޔާ ވަނީ އޭރިއާ ބޭރުން ފޮނުވާލި މޮޅު ހަމަލާއަކުން ޔުނައިޓެޑަށް ތިން ޕޮއިންޓް ކަށަވަރުކޮށްދީފައެވެ.

މިއީ 2023 ވަނަ އަހަރުގެ ޑިސެމްބަރު މަހަށްފަހު އާސެނަލްގެ ކޮޅަށް މެޗެއްގައި ތިން ލަނޑު ވަން ފުރަތަމަ ފަހަރެވެ. މީގެ އިތުރުން ޔުނައިޓެޑް ވެފައިވަނީ 2008 ވަނަ އަހަރަށްފަހު އެމިރޭޓްސް ސްޓޭޑިއަމްގައި އޭރިއާ ބޭރުން ދެ ލަނޑު ޖެހި ފުރަތަމަ ރަށުން ބޭރު ޓީމަށެވެ. މެޗުގައި އާސެނަލުން 15 ހަމަލާ އުފެއްދިއިރު، ޔުނައިޓެޑަށް އުފެއްދިފައިވަނީ 10 ހަމަލާއެވެ.

މައިކަލް ކެރިކް ދެވަނަ ފަހަރަށް ޔުނައިޓެޑާ ހަވާލުވި ފަހުން އެ ޓީމުން ދަނީ މޮޅު ކުޅުމެއް ދައްކަމުންނެވެ. މި މޮޅާއެކު ޔުނައިޓެޑް ވަނީ ތާވަލުގެ ހަތަރުވަނައަށް ޖެހިލާފައެވެ. އަނެއްކޮޅުން މެންޗެސްޓާ ސިޓީ އާއި އެސްޓަން ވިލާ މޮޅުވުމާއެކު، ތާވަލުގެ އެއްވަނައިގައި އޮތް އާސެނަލަށް ވަނީ ލީގު ރޭހުގައި ބޮޑު ޕްރެޝަރަކާ ކުރިމަތިލާން ޖެހިފައެވެ.