މެންޗެސްޓާ ޔުނައިޓެޑާއި ބޯޑޯ/ގްލިމްޓް އަތުން ޖެހިޖެހިގެން ވީ ބައްޔަށްފަހު، މެންޗެސްޓާ ސިޓީން ވުލްވްސް 2-0 އިން ބަލިކޮށް 2026 ވަނަ އަހަރުގެ ފުރަތަމަ ލީގު މޮޅު ހޯދައިފިއެވެ. މި މޮޅާއެކު ތާވަލުގެ އެއްވަނައިގައި އޮތް އާސެނަލްއާ ދެމެދު އޮތް ފަރަގު ސިޓީން ވަނީ ހަތަރު ޕޮއިންޓަށް ކުޑަކޮށްފައެވެ. މިއީ ލީގުގައި އެންމެ ފަހުން ކުޅުނު 5 މެޗުން އެޓީމު މޮޅުވި ފުރަތަމަ މެޗެވެ.

އާލިން ހާލަންޑާއި ފިލް ފޯޑަން ބެންޗުގައި ބައިތިއްބައިގެން ކުޅުނު މި މެޗުގެ ހަވަނަ މިނެޓުގައި ސިޓީން ވަނީ ލީޑު ނަގާފައެވެ. މިއީ މަތިއަސް ނޫނޭޒް ނަގައިދިން ހުރަހަކުން އޮމާ މާމޫޝް ކާމިޔާބުކުރި ގޯލެކެވެ. މީގެ އިތުރުން މާމޫޝް ފޮނުވާލި ހަމަލާއެއް ގޯލުގެ އަރިމަތީ ދަނޑިއަށްވެސް ވަނީ އަރާފައެވެ.

Ad by Hajj Corporation

މެޗުގެ ފުރަތަމަ ހާފުގެ އިތުރު ވަގުތުގެ ދެވަނަ މިނެޓުގައި ސިޓީގެ ދެވަނަ ލަނޑު ކާމިޔާބުކޮށްދިނީ އެންޓޮއިން ސެމެންޔޯ އެވެ. މިއީ އޭނާ ސިޓީއަށް ކާމިޔާބުކޮށްދިން ފުރަތަމަ ޕްރިމިއާ ލީގު ލަނޑެވެ. ސެމެންޔޯ ވެފައިވަނީ 2021 ވަނަ އަހަރު ޖެކް ގްރީލިޝްއަށްފަހު ސިޓީގެ ދަނޑުގައި ކުޅުނު ފުރަތަމަ ލީގު މެޗުގައި ލަނޑު ޖެހި ފުރަތަމަ ކުޅުންތެރިޔާއަށެވެ.

މެޗުގެ ތެރެއިން ވުލްވްސްގެ ޔާސަން މޮސްކޭރާގެ އަތުގައި ބޯޅަ ޖެހުމުން ޕެނަލްޓީއަކަށް އެޕީލް ކުރި ނަމަވެސް، ވީއޭއާރު ބެލުމަށްފަހު ރެފްރީ ނިންމީ އެއީ އަތް އޮންނަންޖެހޭ ގުދުރަތީ މަގާމެއްގައި އޮއްވައި ޖެހުނު ބޯޅައެއް ކަމަށެވެ. ދެވަނަ ހާފުގައި ވުލްވްސްއިން ކުޅުން ރަނގަޅުކުރި ނަމަވެސް، ސިޓީގެ ގޯލްކީޕަރު ޖިއަންލުއިޖީ ޑޮނަރުއްމާއަށް މާ ބޮޑު ނުރައްކަލެއް ކުރިމަތިވެފައެއް ނުވެއެވެ.

ތަފާސްހިސާބުތަކަށް ބަލާއިރު، 2022 ވަނަ އަހަރު ހާލަންޑް ސިޓީއާ ގުޅުނު ފަހުން އޭނާ ނުލައި ކުޅުނު 22 މެޗުގެ ތެރެއިން 18 މެޗުން ސިޓީ ވަނީ މޮޅުވެފައެވެ. މިއީ 82 އިންސައްތައިގެ މޮޅުވުމުގެ ރޭޓެކެވެ. އަނެއްކޮޅުން، ވުލްވްސް އަދިވެސް އޮތީ ތާވަލުގެ އެންމެ ފުލުގައެވެ.