އިނގިރޭސި ޕްރިމިއާ ލީގުގައި އެންމެ ފަހުން ކުޅުނު ތިން މެޗުން މޮޅެއް ނުލިބި އޮތް އޮތުން ނިމުމަކަށް ގެނެސް، ލީޑްސް ޔުނައިޓެޑް އަތުން 4-0 އިން ހޯދި ބޮޑު މޮޅާއެކު އާސެނަލްއިން ތާވަލުގެ އެއްވަނައިގައި ހަތް ޕޮއިންޓުގެ ލީޑެއް ނަގައިފިއެވެ.

މެންޗެސްޓާ ސިޓީ އާއި އެސްޓަން ވިލާ އިން އާސެނަލްއާ ދެމެދު އޮތް ފަރަގު ކުޑަކޮށްފައި ވަނިކޮށް، އެލަންޑް ރޯޑުގައި ހޮނިހިރު ދުވަހު ކުޅުނު މި މެޗުގައި އާސެނަލްއިން ވަނީ މޮޅު ކުޅުމެއް ދައްކާފައެވެ. މެޗު ފެށުމުގެ ކުރިން ވޯމްއަޕްގައި ބުކާޔޯ ސާކާއަށް އަނިޔާވުމާ ގުޅިގެން ކުއްލި ގޮތަކަށް ފުރަތަމަ އެގާރައިގައި ހިމެނި ނޯނީ މަޑުއޭކޭ ވަނީ މި މެޗުގައި މުހިންމު ދައުރެއް އަދާކޮށްފައެވެ.

Ad by Hajj Corporation

މެޗުގެ 27 ވަނަ މިނެޓުގައި އާސެނަލްގެ ފުރަތަމަ ލަނޑު ކާމިޔާބުކޮށްދިނީ މާޓިން ޒުބިމެންޑީއެވެ. މިއީ ޕްރިމިއާ ލީގުގައި ކުޅުނު 300 ވަނަ މެޗު ފުރިހަމަކުރި ޑެކްލަން ރައިސް ތަނަވަސްކޮށްދިން ފުރުސަތަކުން މަޑުއޭކޭ ނަގައިދިން ހުރަހެއް ބޮލުން ޖަހައި އޭނާ ކާމިޔާބުކުރި ލަނޑެކެވެ. އޭގެ 11 މިނެޓު ފަހުން މަޑުއޭކޭ ނަގައިދިން ކޯނަރެއް ދިފާއުކުރަން އުޅުމުގެ ތެރޭގައި ލީޑްސްގެ ކީޕަރު ކާލް ޑާލޯ އަތުން ވަނީ ބައިކޮޅަށް ލަނޑެއް ވަދެފައެވެ.

އާސެނަލްގެ ތިންވަނަ ލަނޑު 69 ވަނަ މިނެޓުގައި ކާމިޔާބުކޮށްދިނީ ވިކްޓަރ ގިޔޮކެރޭސްއެވެ. މިއީ މިދިޔަ ޑިސެމްބަރު މަހުގެ މެދުތެރެއަށް ފަހު އޭނާ ޖެހި ފުރަތަމަ ލަނޑެވެ. އަދި މެޗު ނިމެން ހަތަރު މިނެޓަށް ވެފައި ވަނިކޮށް، ގިޔޮކެރޭސްގެ ބަދަލުގައި ކުޅެން އެރި ގަބްރިއަލް ޖީސޫސް ވަނީ ހަތަރުވަނަ ލަނޑު ޖަހައި ނަތީޖާގެ ފަރަގު ބޮޑުކޮށްދީފައެވެ.

މި މޮޅާއެކު އާސެނަލްގެ ކޯޗު މިކޭލް އާޓެޓާ ވަނީ ލީގު ރޭހުގެ ކޮންޓްރޯލް އަލުން ހޯދާފައެވެ.