އީ.އެފް.އެލް ކަޕްގެ ސެމީ ފައިނަލްގައި ޗެލްސީއާ ދެކޮޅަށް ކުޅުނު ފުރަތަމަ ލެގު 3-2 ގެ ނަތީޖާއަކުން އާސެނަލް ކާމިޔާބުކޮށްފިއެވެ. ސްޓެމްފޯޑް ބްރިޖްގައި ކުޅުނު މި ފޯރިގަދަ މެޗުގައި އާސެނަލްގެ ވިކްޓަރ ގިޔޮކެރޭސް ވަނީ ލަނޑެއް ޖަހައި އިތުރު ލަނޑެއް ޖެހުމަށް އެހީތެރިވެދީފައެވެ.

ޗެލްސީގެ އާ ކޯޗު ލިއަމް ރޮސީނިއާގެ އިރުޝާދުގެ ދަށުން އަމިއްލަ ދަނޑުގައި ކުޅުނު ފުރަތަމަ މެޗުން އެ ޓީމު ބަލިވީ، ބަދަލު ކުޅުންތެރިއެއްގެ ގޮތުގައި ކުޅެން އެރި އަލެހަންދްރޯ ގާނާޗޯ ދެ ލަނޑު ޖަހާފައިވަނިކޮށެވެ. އާސެނަލްގެ ފަރާތުން ގިޔޮކެރޭސްގެ އިތުރުން ލަނޑުތައް ކާމިޔާބުކޮށްދިނީ ބެން ވައިޓް އަދި މާޓިން ޒުބިމެންޑީއެވެ.

Ad by Hajj Corporation

މެޗުގެ ހަތްވަނަ މިނެޓުގައި ޑެކްލަން ރައިސް ނަގައިދިން ކޯނަރަކުން ބެން ވައިޓް ވަނީ ބޮލުން ފޮނުވާލި ހަމަލާއަކުން އާސެނަލަށް ކުރިހޯދައިދީފައެވެ. ދެވަނަ ހާފު ފެށިގެން ހަތަރުވަނަ މިނެޓުގައި ޗެލްސީގެ ކީޕަރު ރޮބާޓް ސަންޗޭޒަށް ހެދުނު ގޯހެއްގެ ފައިދާ ނަގައި ގިޔޮކެރޭސް ވަނީ އާސެނަލްގެ ދެވަނަ ލަނޑު ޖަހައިދީފައެވެ. ނަމަވެސް، މެޗުގެ ގަޑިއެއްހާއިރު ވީތަނާ ގާނާޗޯ ވަނީ ޗެލްސީއަށް ފުރަތަމަ ލަނޑު ކާމިޔާބުކޮށްދީ އުންމީދު އާކޮށްދީފައެވެ.

މެޗުގެ 71 ވަނަ މިނެޓުގައި ޒުބިމެންޑީ ވަނީ އާސެނަލްގެ ތިންވަނަ ލަނޑު ޖަހައި އަލުން ދެ ލަނޑުގެ ލީޑެއް ހޯދައިދީފައެވެ. އެހެންނަމަވެސް، މެޗު ނިމެން ގާތްވެފައިވަނިކޮށް ގާނާޗޯ ވަނީ އޭނާގެ ދެވަނަ ލަނޑު ޖަހައި، ފެބްރުއަރީ 3 ވަނަ ދުވަހު ކުޅޭ ދެވަނަ ލެގުގެ ކުރިން ޗެލްސީއަށް އުންމީދެއް ހޯދައިދީފައެވެ.

މި ނަތީޖާއާއެކު އާސެނަލަށް ކުރި ލިބިފައިވީ ނަމަވެސް، އެމިރޭޓްސް ސްޓޭޑިއަމްގައި ކުޅޭ ދެވަނަ ލެގަށް ނުކުންނައިރު ޗެލްސީ އޮތީ އެންމެ ލަނޑެއްގެ ފަހަތުގައެވެ.
ސެމީގެ ދެވަނަ މެޗުގައި ސިޓީ އާއެކު ނިއުކާސަލް ވާދަކުރާއިރު، ފުރަތަމަ ލެގުގައި ސިޓީ ވަނީ ކުރި ހޯދައި ފައިނަލުގެ ޖާގައެއް ހޯދުމާއި ގާތަށް ޖެހިލާފައެވެ.