އެފްއޭ ކަޕްގައި ތިންވަނަ ޑިވިށަނުގެ މޭންސްފީލްޑް ޓައުންއާ ދެކޮޅަށް ކުޅުނު މެޗު 2-1 އިން ކާމިޔާބުކޮށް، އާސެނަލް މުބާރާތުގެ ކުއާޓާ ފައިނަލުން ޖާގަ ހޯދައިފިއެވެ. މޭންސްފީލްޑްގެ ވަން ކޯލް ސްޓޭޑިއަމްގައި ކުޅުނު މި މެޗުގައި އާސެނަލް ސަލާމަތްކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އެބެރެޗީ އެޒޭ ކާމިޔާބުކުރި ލަނޑުންނެވެ.

މެޗުގެ ފުރަތަމަ ހާފުގައި އާސެނަލަށް ލީޑު ނަގައިދިނީ ނޯނީ މަޑުއޭކޭއެވެ. އޭނާ ވަނީ 41 ވަނަ މިނެޓުގައި ގޯލުގެ މަތީ ކަނަށް ބޯޅަ ފޮނުވާލައިގެން ޓީމަށް ކުރިހޯދައިދީފައެވެ. ނަމަވެސް ދެވަނަ ހާފު ފެށިގެން ފަސްވަނަ މިނެޓުގައި މޭންސްފީލްޑްގެ ވިލް އެވަންސް ވަނީ ލަނޑެއް ޖަހައި ނަތީޖާ ހަމަހަމަކޮށްފައެވެ. މި ލަނޑު އޭނާ ކާމިޔާބުކުރީ އާސެނަލްގެ މާލީ ސަލްމަންއަށް ހެދުނު ގޯހެއްގެ ފައިދާ ނަގައިގެންނެވެ.

Ad by Hajj Corporation

އާސެނަލް މޮޅުވި ލަނޑު މެޗުގެ 66 ވަނަ މިނެޓުގައި ކާމިޔާބުކޮށްދިނީ އެޒޭއެވެ. އޭނާ ވަނީ އޭރިއާ ބޭރުން ބާރު ހަމަލާއެއް ފޮނުވާލައިގެން މޭންސްފީލްޑްގެ ގޯލްކީޕަރު ލިއަމް ރޮބާޓްސްއަށް އެއްވެސް ފުރުސަތެއް ނުދީ ގޯލުގެ ތެރެއަށް ބޯޅަ ފޮނުވާލާފައެވެ. މި މޮޅާއެކު 2025-26 ވަނަ ސީޒަނުގެ ހަތަރު މުބާރާތް ކާމިޔާބުކުރުމަށް އާސެނަލް ކުރަމުންދާ އުންމީދުތައް ވަނީ ދަމަހައްޓާފައެވެ.

މި މެޗުގައި އާސެނަލްގެ ކޯޗު މިކޭލް އާޓެޓާ ވަނީ ޒުވާން ކުޅުންތެރިންނަށް ފުރުސަތު ދީފައެވެ. އެގޮތުން 16 އަހަރުން ދަށުގެ ދެ ކުޅުންތެރިން ކަމަށްވާ މެކްސް ޑޯމަން އަދި މާލީ ސަލްމަން ވަނީ ފުރަތަމަ އެގާރައިގައި ހިމެނިގެން ކުޅެފައެވެ. މިއީ އިނގިރޭސި ޕްރިމިއާ ލީގުގެ ޓީމަކުން އެއް މެޗެއްގައި 16 އަހަރުން ދަށުގެ ދެ ކުޅުންތެރިން ފުރަތަމަ އެގާރައިގައި ހިމަނައިގެން ކުޅުނު ފުރަތަމަ ފަހަރެވެ.

މި މެޗުގައި ޖެހި ލަނޑުތަކާއެކު އާސެނަލް ވަނީ މި ސީޒަނުގައި ހުރިހާ މުބާރާތެއްގައި 100 ލަނޑު ހަމަކުރި ޕްރިމިއާ ލީގުގެ ފުރަތަމަ ޓީމަށް ވެފައެވެ. ޔޫރަޕްގެ ގަދަ ފަސް ލީގަށް ބަލާއިރު މި ސީޒަނުގައި މި އަދަދަށް ލަނޑު ހަމަކުރެވުނީ ބަޔާން މިއުނިކް އަދި ބާސެލޯނާއަށް އެކަންޏެވެ.