ހުޅުމާލެއިން ދޫކޮށްފައިވާ ސޯޝަލް ހައުސިންގ ޔުނިޓްތައް ބިދޭސީންނަށް ކުއްޔަށް ދީފައިވާނަމަ އެކަން ބަލައި ފިޔަވަޅު އަޅާނެކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ން ބުނެފިއެވެ.

ޝަރުތު ހަމަވާ ފަރާތްތަކަށް ހުޅުމާލޭގައި ތަރައްގީކޮށް ސަރުކާރުން ދޫކޮށްފައިވާ ސޯޝަލް ހައުސިންގ ޔުނިޓުތައް، ބައެއް ފަރާތްތަކުން ގަވައިދާ ހިލާފަށް ބިދޭސީންނަށް ކުއްޔަށް ދެމުންދާކަން އެޗްޑީސީން ކުރި އިއުލާނެއްގައި ފާހަގަކޮށްފައިވެއެވެ.

މިފަދައިން ސޯޝަލް ހައުސިންގގެ ދަށުން ދޫކޮށްފައިވާ އެއްވެސް ޔުނިޓެއް އެއްވެސް ފަރާތަކުން ބިދޭސީންނަށް ކުއްޔަށް ދީފައިވާނަމަ 3 ޖަނަވަރީ 2026 ގެ ކުރިން އެތަންތަން ހުސްކުރުމަށް އެ ފަރާތްތަކަށް އެންގުމަށް އެޗްޑީސީން އަންގާފައިވެއެވެ.

އަދި ފްލެޓު ލިބިފައިވާ ފަރާތްތަކުން އެޗްޑީސީއާއިއެކު ވެފައިވާ އެއްބަސްވުމާއި އެއްގޮތައް އަމަލުކުރުމަށް އެ ކޯޕަރޭޝަނުން ހަނދާންކޮށްދީފައި ވެއެވެ.
3 ޖަނަވަރީގެ ފަހުން ހުޅުމާލެއިން ދުކޮށްފައިވާ އެއްވެސް ސޯޝަލް ހައުސިންގ ޔުނިޓެއް ބިދޭސީންނަށް ކުއްޔަށް ދީފައިވާނަމަ އެ ކޯޕަރޭޝަންއާއިއެކު ވެފައިވާ ފްލެޓު އެއްބަސްވުން އުވާލެވޭނެކަމަށް އެޗްޑީސީން ބުނެއެވެ.

Ad by Hajj Corporation

އަދި މިފަދަ ކަންކަމުގައި އާންމު ފަރާތްތަކުން އެ ކޯޕަރޭޝަންއަށް ދެމުންދާ އެއްބާރުލުން ފާހަގަކޮށް، އެޗްޑީސީން ޝުކުރުއަދާކޮށްފައި ވެއެވެ.