ދިވެހިރާއްޖޭގެ އެއްބައިވަންތަކަމުގެ ދުވަހުގެ ތަހުނިޔާ އިޚްލާޞްތެރި ދުޢާއަކުން، ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު، ފޮނުއްވައިފިއެވެ.

ދުވަހުގެ މުނާސަބަތުގައި މީސްމީޑީއާގައި ކުރެއްވި ޕޯސްޓެއްގައި ފަސްޓް ލޭޑީ ވަނީ، ދިވެހިންނަކީ އުޚުއްވަތްތެރި، އޯގާތެރި، އެކަކު އަނެކަކަށް ވާގިވެރި، ހިތްވަރުގަދަ ބައެއްގެ ގޮތުގައި އަބަދުމެ ލެހެއްޓެވުން އެދިވަޑައިގެން، ﷲ ތަޢާލާގެ ޙަޟްރަތުގައި ދުޢާދަންނަވާފައެވެ.

Ad by Hajj Corporation

އަދި އެއަށްފަހު، ދިވެހި މި ޤައުމުގައި، އިލާހީ ޙިމާޔަތާއި މަދަދާއި އޯގާވަންތަކަން ރެއާއި ދުވާލު ދެމެހެއްޓެވުން އެދިވަޑައިގެން ދުޢާ ދަންނަވާފައި ވެއެވެ.

ދިވެހިރާއްޖޭގައި އެއްބައިވަންތަކަމުގެ ދުވަހެއް ފާހަގަކުރަނީ، 2004 ވަނަ އަހަރުގެ ޑިސެމްބަރު މަހުގެ 26 ވަނަ ދުވަހު ރާއްޖެއަށް ކުރިމަތިވި ސުނާމީގެ ހިތާމަވެރި ކާރިޘާގެ ހަނދާނުގައެވެ. އެދުވަހު ދިވެހީން ދައްކާފައިވަނީ އެއްބައިވަންތަކަމާއި އެކަކު އަނެކަކަށް އަޅާލުމާއި އޯގާތެރިކަމުގެ ވަރުގަދަ ނަމޫނާއެކެވެ.

އެކި ރަށްރަށުން އެތައް ދިވެހީންނެއްގެ ފުރާނަ ގެއްލި، އެތައް ބަޔަކު ވީނުވީއެއް ނޭނގި ގެއްލި، ގެދޮރާއި މުޅި ރަށް ސުންނާފަތިކޮށްލި އެކާރިސާއިން އަރައިގަތުމަށް ދިވެހީން ދެއްކީ އެކަކު އަނެކަކަށް އޯގާތެރިވުމާއި އާދަޔާ ޚިލާފު ހިތްވަރެކެވެ.