ހުޅުމާލޭ ދެވަނަ ފިޔަވަހީގައި ފޮތް ކިޔުމަށް ހާއްސަކޮށް "ރީޑިންގ ނުކް" އެއް ގާއިމްކޮށް، އެތަން ހުޅުވައިފިއެވެ.

މިތަން ގާއިމުކޮށްފައިވަނީ ހުޅުމާލެ ދެވަނަ ފިޔަވަހީގެ ހިޔާ ޕާކު ނުވަތަ ރުއްގަނޑު 3 ސަރަހައްދުގައެވެ.

މިއީ ހިޔާ ޕާކު ސަރަހައްދަށް ޒިޔާރާތްކުރާ ފަރާތްތަކުން، އެ ސަރަހައްދުގައި ތިބެގެން ހިތްހަމަޖައްސާލައި، ފޮތް ކިޔޭނެ މަގުފަހިކުރުމަށް ގާއިމުކުރި ތަނެއްކަމަށް އެޗްޑީސީން ބުނެއެވެ. އެގޮތުން ހުރިހާ އުމުރުފުރާއެއްގެ ފަރާތްތަކަށްވެސް އެކަށީގެންވާ، ދިވެހި އަދި އިނގިރޭސި ފޮތްތައް މި ނުކްއިން ލިބެން ހުންނާނެއެވެ.

އެޗްޑީސީން ބުނީ، މި ނުކްއިން 1 އަހަރާއި 6 އަހަރުގެ ކުދިންނަށް ހާއްސަ ފޮތްތަކާއި 6 އަހަރާއި 10 އަހަރުގެ ކުދިންނަށް ހާއްސަ ފޮތްތައް، ޓީން ފިކްޝަން ފޮތްތައް، ދިވެހި ބަސް އުނގެނުމަށް ހާއްސަ ފޮތްތައް، އަދި ކެއްކުމާއި ލައިފްސްޓައިލްގެ އިތުރުން ދީނީ ފޮތްތައްވެސް ލިބެން ހުންނާނެކަމަށެވެ.
ހިޔާ ޕާކު ސަރަހައްދަށް ޒިޔާރާތްކުރާ ފަރާތްތަކުން ފޮތް ކިޔަން ބޭނުންނަމަ ނުކް އިން ފޮތް ނެގުމަށްފަހު، އެ ޕާކު ސަރަހައްދުގެ ކޮންމެ ހިސާބެއްގައިވެސް ފޮތް ކިޔަން ތިބެވޭނެއެވެ. ނަމަވެސް އެ ސަރަހައްދުން ދިޔުމުގެ ކުރިން ފޮތް އަނބުރާ ރައްދުކުރަންވާނެކަމަށް އެޗްޑީސީން ބުނެއެވެ.

Ad by Hajj Corporation

ރީޑީންގ ނުކް ހުޅުވުފައި ހުންނާނީ، ކޮންމެ ދުވަހަކުވެސް ހެނދުނު 08:30 އިން ރޭގަނޑު 08:00 އަށެވެ. މިއީ ފޮތް ކިޔުމަށް ޝައުގުވެރިކަން ހުންނަ ފަރާތްތަކަށް، އަދި ހުޅުމާލޭގެ ކޮމިއުނިޓީ އެންގޭޖްމަންޓު އިތުރުކުރުމަށާއި ނަފްސާނީ ދުޅަހެޔޮކަން ރަނގަޅުކުރުމަށް ކުރިއަށް ގެންދެވުނު މުހިންމު ޕްރޮޖެކްޓެއްކަން އެޗްޑީސީން ފާހަގަކުރެއެވެ.