އިނގިރޭސި ޕްރިމިއާ ލީގުގައި މިރޭ ބްރައިޓަންއާ ދެކޮޅަށް ކުޅުނު މެޗު އިނދިކޮޅުޓީމުން ބައިކޮޅަށް ޖެހި ގޯލަކާއެކު މެޗު ކާމިޔާބުކޮށް، އާސެނަލްއިން އަލުން ތާވަލުގެ އެއްވަނަ މަގާމަށް ޖެހިލައިފިއެވެ. އެމިރޭޓްސް ސްޓޭޑިއަމްގައި ކުޅުނު މި މެޗު އާސެނަލްއިން ކާމިޔާބުކުރީ ޑިފެންސަށް ދިމާވި ގޮންޖެހުންތަކަކާއެކުގައެވެ.

މެޗު ފެށުމުގެ ކުރިން މެންޗެސްޓަރ ސިޓީން ނޮޓިންހަމް ފޮރެސްޓް ބަލިކުރުމާ ގުޅިގެން އާސެނަލް އޮތީ ތާވަލުގެ ދެވަނައަށް ވެއްޓިފައެވެ. ނަމަވެސް މި މެޗުން ލިބުނު ތިން ޕޮއިންޓާއެކު އާސެނަލްއަށް ވަނީ އަލުން ތާވަލުގެ އެއްވަނަ ލިބިފައެވެ.

Ad by Hajj Corporation

މި މެޗަށް ކުރިމަތިލިއިރު އާސެނަލްގެ ޑިފެންސަށް ވަނީ ބޮޑެތި ލޮޅުންތަކެއް އަރާފައެވެ. މިދިޔަ ހަފުތާގައި ކްރިސްޓަލް ޕެލަސްއާ ދެކޮޅަށް ކުޅުނު މެޗުގައި ލިބުނު އަނިޔާއަކާ ގުޅިގެން ޖޫރިއަން ޓިމްބާ މެޗުގެ ސްކޮޑުގައި ހިމެނިފައެއް ނުވެއެވެ. މީގެ އިތުރުން، މެޗު ފެށުމުގެ ކުޑަވަގުތުކޮޅެއް ކުރިން ރިކާޑޯ ކަލަފިއޯރީއަށް ދިމާވި މައްސަލައަކާ ގުޅިގެން އޭނާވެސް ވަނީ ފުރަތަމަ އެގާރައިން ބާކީކުރަން ޖެހިފައެވެ.

މެޗުގެ ފުރަތަމަ ހާފުގައި ކެޕްޓަން މާޓިން އޮޑެގާޑް ޖަހައިދިން ލަނޑާއި، އަދި ދެވަނަ ހާފުގައި އާސެނަލްގެ ކޯނަރެއް ސާފުކޮށްލްން އުޅުމުގެ ތެރޭގައި ބްރައިޓަންގެ ޖޯޖީނިއޯ ރަޓާ އަތުން ބައިކޮޅަށް ވަން ލަނޑާއެކު އާސެނަލްއިން ވަނީ ދެ ލަނޑުގެ ލީޑެއް ނަގާފައެވެ. މެޗުގެ ފަހުކޮޅު ބްރައިޓަންގެ ޑިއޭގޯ ގޯމޭޒް ލަނޑެއް ޖަހައި ފަރަގު ކުޑަކުރި ނަމަވެސް، އާސެނަލްއިން ވަނީ މެޗުގެ ނަތީޖާ ހިފަހައްޓާފައެވެ.

މި މުހިންމު މޮޅާއެކު އާސެނަލްއިން ވަނީ ލީގު ރޭހުގައި އެމީހުންގެ ވަރުގަދަކަން ސާބިތުކޮށްދީފައެވެ. އަނިޔާގެ މައްސަލަތަކާއެކުވެސް ޓީމުން ދެއްކި ކުޅުމަކީ ކުރިއަށް ހުރި މެޗުތަކަށް ލިބުނު ބޮޑު ހިތްވަރެކެވެ.