ފަލަސްތީނުގެ ނޫސްވެރި އާއިލާތަކުން 700 އަށްވުރެ ގިނަ މީހުން ޝަހީދުކޮށްލައިފިއެވެ.

ފަލަސްތީނުގެ ނޫސްވެރިން ތައްޔާރުކޮށްފައިވާ ރިޕޯޓެއްގައި ބުނީ، 2023 ވަނަ އަހަރުގެ އޮކްޓޫބަރު މަހު އިސްރާއީލުން ޣައްޒާއަށް ހަމަލާތައް ދޭން ގެށި ފަހުން މިހާތަނަށް ފަލަސްތީނުގެ ނޫސްވެރިންގެ އާއިލާތަކުގެ 706 މީހަކު ޝަހީދުކޮށްލާފައިވާ ކަމަށެވެ.

Ad by Hajj Corporation

ނޫސްވެރިންގެ ޖަމާއަތަކުން ނެރުނު ރިޕޯޓެއްގައި ބުނެފައި ވަނީ ފަލަސްތީނުގެ ނޫސްވެރިކަން ހުއްޓުވުމުގެ ގޮތުން އިސްރާއީލުން ރާވައިގެން ނޫސްވެރިންގެ އާއިލާތަކަށް ހަމަލާ ދެމުން އަންނަ ކަމަށެވެ.

އެ ޖަމާއަތުގެ ފްރީޑަމްސް ކޮމިޓީގެ އިސްވެރިޔާ މުހައްމަދު އަލް ލަހްހަމް ވިދާޅުވީ 2023 ވަނަ އަހަރުން ފެށިގެން 2025 ވަނަ އަހަރާ ހަމައަށް ދިން ހަމަލާތަކުން ދޭހަވަނީ ޣައްޒާގައި މިނިވަން ނޫސްވެރިކަން ހުއްޓުވަން އިސްރާއީލުން ގަސްތުކުރާ ކަމަށެވެ.

ހަނގުރާމަތަކާއި އަސްކަރީ ކުރިމަތިލުންތައް ހިނގާ ސަރަހައްދުތަކުގައި ހަރަކާތްތެރިވާ ނޫސްވެރިންނަށް ގަސްދުގައި ހަމަލާ ދިނުމަކީ، ވަރަށް މަދު ފަހަރެއްގައި ނޫނީ މީގެ ކުރިން މެދުވެރިވާ ކަމެއް ނޫނެވެ. އަދި އެއީ ދުނިޔޭގެ ވަރަށް މަދު ގައުމެއްގައި ނޫނީ ހިނގާ ކަމެއް ވެސް ނޫނެވެ.

އިސްރާއީލުން ޣައްޒާގައި ހިންގަމުން ދާ ގަތުލުއާންމުތަކާއި ހަނގުރާމައިގެ ޖަރީމާތަކުގެ ހަގީގަތްތައް ދުނިޔެއަށް ބޭޒާރުވަމުން ދަނީ، ފުރާނަ އަތްމައްޗަށް ލައިގެން ނުކުމެ ތިބި ހިތްވަރު ގަދަ ނޫސްވެރިންގެ ސަބަބުންނެވެ. ޚާއްސަ ގޮތެއްގައި އަލްޖަޒީރާގެ އަރަބި ޗެނަލްގެ ނޫސްވެރިންގެ ހިތްވަރުގެ ސަބަބުންނެވެ.

އެ ނޫސްވެރިން ޣައްޒާގައި ހަރަކާތްތެރިވަމުން ދަނީ، ހަމަލާތައް ދިނުމުގައި ނޫސްވެރިންނަށް ރައްކާތެރިކަން ކަށަވަރުކޮށްނުދެވޭނެ ކަމަށް އިސްރާއީލުން ބުނެފައިވަނިކޮށެވެ. އިސްރާއީލުން އެހެން ބުނާ އިރު، އެއީ ނޫސްވެރިންކަން އެނގި ތިބެ އިސްރާއީލު ސިފައިން ގަސްދުގައި ދިން ހަމަލާތަކުގައި އެތައް ނޫސްވެރިންނެއް ޝަހީދުވެއްޖެއެވެ.