ޔަހޫދީ ދައުލަތުގައި އަލް ޖަޒީރާ މީޑިޔާ ނެޓްވޯކްގެ މަސައްކަތްތައް ކުރުން މަނާކޮށް، އެ މީޑިޔާގެ އިދާރާތައް ބަންދުކުރަން ނިންމި ނިންމުން، އިތުރު 90 ދުވަހުގެ މުއްދަތަށް އިތުރުކޮށްފިއެވެ.

ޔަހޫދީންގެ މި ނިންމުމުގެ ދަށުން އެއްވެސް ބްރޯޑްކާސްޓިންގ އަދި އިންޓަނެޓުގެ ޚިދުމަތްދޭ ކުންފުންޏަކަށް ވެސް އަދި ޔޫޓިއުބައަށް ވެސް ޔަހޫދީ ދައުލަތުގެ ތެރޭގައި އަލް ޖަޒީރާއަށް ޚިދުމަތް ދިނުން މަނާވާނެއެެވެ.

2024 ވަނަ އަހަރުގެ ތެރޭގައި ޔަހޫދީންގެ ޤާނޫނު ހަދާ މަޖިލީހުން، ބޭރުގެ ނޫސްތައް ޔަހޫދީ ދައުލަތުގައި މަސައްކަތްކުރުން މަނާ ކުރެވޭނެ ޤާނޫނެއް ފާސްކޮށްފައިވެއެވެ. އޭރު ޔަހޫދީން ދިޔައީ ޣައްޒާގެ ރައްޔިތުން ނަސްލުހޭދު ކުރުމަށް އެސަހަރަށް ޙަމަލާތައް ދީ، އެތައް ބަޔަކު ޝަހީދުކުރަމުންނެވެ. އެއަށްފަހު 2024 ވަނަ އަހަރުގެ މެއި މަހުގެ ތެރޭގައި ޔަހޫދީ ވަޒީރުންގެ މަޖިލީހުން ވަނީ ޔަހޫދީ ދައުލަތުގައި އަލް ޖަޒީރާއިން ޙަރަކާތްތެރިވުން މަނާކޮށްފައެވެ. އެއަށްފަހު، އެއަހަރުގެ ސެޕްޓެމްބަރު މަހުގެ ތެރޭގައި ޔަހޫދީ ސިފައިން ވަނީ އެމީހުން އިސްތިއުމާރުކޮށްފައިވާ ހުޅަނގު އައްސޭރީގެ ރާމަاللهގައި ހުންނަ އަލް ޖަޒީރާގެ އިދާރާއަށް ވަދެގަނެ، އެތަނުގައި ހުރި ސާމާނާއި ލިޔެކިޔުންތައް ނައްތާލުމަށްފަހު އެ އިމާރާތުގައި ތަޅުއަޅުވާފައެވެ.

އަލް ޖަޒީރާއާ ގުޅޭގޮތުން ހަޤީޤަތާ ޚިލާފު ވާހަކަތައް ނަތަންޔާހޫ ފަތުރަމުންދާ ކަމަށާއި ޔަހޫދީން އަލް ޖަޒީރާއާ މެދު ޢަމަލުކޮށްފައި ވަނީ ބައިނަލްއަޤްވާމީ ޤާނޫނުތަކާ ޚިލާފަށް ކަމަށް އެނޫހުން އޭރު ބުނެފައިވެއެވެ. އަދި ޔަހޫދީންގެ ޢަމަލުތަކުގެ ސަބަބުން އެ މީޑިއާގެ މަސައްކަތްތައް ނުހުއްޓުވޭނެ ކަމަށް ވެސް އަލް ޖަޒީރާއިން ބުނެފައިވެއެވެ.

މިދިޔަ އަހަރުގެ ޑިސެމްބަރު މަހުގެ ތެރޭގައި ޔަހޫދީ ޤާނޫނުހަދާ މަޖިލީހުން ވަނީ 2024 ވަނަ އަހަރު ފާސްކުރި ޤާނޫނުގެ މުއްދަތު އިތުރު ދެ އަހަރަށް އިތުރުކޮށްފައެވެ. އަލް ޖަޒީރާއަށް ޔަހޫދީ ދައުލަތުގައި ޙަރަކާތްތެރި ނުވެވޭ މުއްދަތު އަނެއްކާ ވެސް އިތުރުކޮށްފައި މި ވަނީ އެ މީޑިޔާއިން ގެނެސްދޭ ޚަބަރުތަކާ ގުޅޭގޮތުން ޔަހޫދީންގެ މުވާސަލާތާބެހޭ ވަޒީރު ވާހަކަތަކެއް ދެއްކިތާ ނުވަ ދުވަސް ފަހުންނެވެ.

ޔަހޫދީންގެ ލާއިންސާނީ ޢަމަލުތައް ފޮރުވުމަށްޓަކައި އަލް ޖަޒީރާގެ މަސައްކަތްތައް ހުއްޓުވުމަށް އެ ދައުލަތުން މަސައްކަތްކުރަމުންދާތާ އެތައް އަހަރެއް ވަނީ ވެފައެވެ. 2017 ވަނަ އަހަރުގެ ތެރޭގައި ޔަހޫދީންގެ ޖައްބާރު ބޮޑުވަޒީރު، ބެންޖަމިން ނަތަންޔާހޫ ވަނީ ޤުދުސްގައި ހުންނަ އަލް ޖަޒީރާގެ އިދާރާ ބަންދުކުރާނެ ކަމުގެ އިންޒާރު ދީފައެވެ.

މީގެ އިތުރުން 2021 ވަނަ އަހަރު ދިން މިސައިލް ޙަމަލާއެއްގައި ޔަހޫދީން ވަނީ ޣައްޒާގައި ހުންނަ އަލް ޖަޒީރާގެ އިދާރާ ސުންނާފަތިކޮށްލާފައެވެ. އަލް ޖަޒީރާގެ ގިނަ ޢަދަދެެއްގެ ނޫސްވެރިންނާއި އެމީހުންގެ ޢާއިލާތަކަށް ވެސް ޔަހޫދީންގެ ޙަމަލާތައް ތަކުރާރުކޮށް އަމާޒުވެއެވެ. ޣައްޒާ ހަނގުރާމައިގައި ޝަހީދުކޮށްލާފައިވާ ފަލަސްޠީނުގެ 200 އަށްވުރެ ގިނަ ނޫސްވެރިންގެ ތެރޭގައި އަލް ޖަޒީރާގެ ނޫސްވެރިން ވެސް ހިމެނެއެވެ. 2022 ވަނަ އަހަރުގެ ތެރޭގައި ހުޅަނގު އައްސޭރީގައި އަލް ޖަޒީރާގެ ނޫސްވެރިއެއް ކަމަށްވާ ޝީރީން އަބޫ ޢާޤިލާގެ ގަޔަށް ބަޑިޖަހައި އޭނާ ވަނީ ޝަހީދުކޮށްލައިފައެވެ.

Ad by Hajj Corporation