އުތުރުގައި ހިންގާ ބަންކަރިންގައި އުފެދޭ ކުނިތައް ނައްތާލުމަށް ވެމްކޯ އަށް ހަވާލުކޮށްފިއެވެ.

އެކަމުގެ އެމްއޯޔޫއެއްގައި، އެ މަސައްކަތް ހިންގާ އެމްޕީއެލް އިން ވަނީ ވެމްކޯއާއެކު މިއަދު ސޮއިކޮށްފައެވެ.

Ad by Hajj Corporation

އެ އެއްބަސްވުމުގައި ސޮއިކުރުމަށްފަހު ނޫސްވެރިންނާ ވާހަކަފުޅު ދައްކަވަމުން އެމްޕީއެލްގެ ސީއީއޯ މުޙައްމަދު ވަޖީހް އިބްރާހިމް ވިދާޅުވީ، އުލިގަމުގައި ގާއިމްކޮށްފައިވާ ބަންކަރިންގެ ޚިދުމަތުން ޖަމާވާ ކުނިތައް، މީގެ ފަހުން ނަގާނީ ވެމްކޯއިން ކަމަށެވެ. އެގޮތުން އެ ކުނިތައް އުލިމަގުން ނަގައި، އެ ކުނިތައް ގެންދާނީ އެހެން ރަަށަކަށް ކަމަށް ވަޖީހް ވިދާޅުވިއެވެ.

އެކަމާ ގުޅޭ ގޮތުން ވެމްކޯގެ މެނޭޖިން ޑިރެކްޓަރު މުޖްތަބާ ޖަލީލު ވިދާޅުވީ، ބަންކަރިން އިން ޖަމާވާ ކުނިތައް ގެންދާނީ އެ އަތޮޅު ކުނބުރުދޫއަށް ކަމަށެވެ. އެގޮތުން އެ މަސައްކަތް ކުރުމަށް، ކުނބުރުދޫ ރީޖިނަލް ފެސިލިޓީއަކަށް ބަދަލުކުރާނެ ކަމަށް މުޖްތަބާ ވިދާޅުވިއެވެ.

ބަންކަރިން އިން ކުނީގެ ގޮތުގައި ޖަމާވާނެ ކަމަށް ބެލެވޭ ބޭނުންކޮށްފައިވާ ތެލާ ގުޅޭ ގޮތުން މުޖްތަބާ ވިދާޅުވީ، ބޭނުންކުރާ ތެޔޮތަށް ނައްތާލުމުގައި ދަތިތަކާ ކުރިމަތިވާނެ ކަމަށާއި، އެ ތެޔޮ ރައްކާކުރާނެ ޚާއްސަ ޓޭންކެއް އެރަށުގައި ބަހައްޓާނެ ކަމަށެވެ.

މުޖްތަބާ ވިދާޅުވި ގޮތުގައި، އެ މަސައްކަތް ކުރިއަށްދާ ވަރަކަށް އިތުރު ވަޒީފާތައް ވެސް އުފެދި، އެ މަސައްކަތުން އެކުންފުންޏަށް ރަނގަޅު ޢާމްދަނީއެއް ލިބޭނެއެވެ.

ރާއްޖޭގެ އުތުރުގައި ބަންކަރިންގެ ޚިދުމަތް ފޯރުކޮށްދެނީ އެސްޓީއޯ އަދި އެމްޕީއެލް ގުޅިގެންނެވެ.